Ақтөбеде тұрғын үйдің жанынан екі адамның денесі табылды

Ақтөбе қаласында 24 сәуір патрульдік полиция қызметкерлері тұрғын үй кешенінің маңынан екі әйелдің денесін тапты, деп хабарлайды Polisia.kz ақпараттық медиа-портал Тelegram-дағы арнасында.

"24 сәуір сағат 01:48 шамасында Жедел басқару орталығының 102 пультіне "Ақтөбе Ажары" 112 тұрғын үй кешенінің жоғарғы қабатынан адам құлағаны туралы хабарлама келіп түсті.

Оқиға орнына келген патрульдік полиция қызметкерлері үйге кірер есіктің алдында екі әйелдің денесін тапты", - делінген ведомство хабарламасында.

Медиапорталдың жазуынша, полицейлер марқұмдардың жеке басын анықтады. Олар 31 және 56 жастағы әйелдер екені белгілі болды.

Қылмыстық кодекстің 105 бабы 2-бөлігіне сәйкес сотқа дейінгі тергеу жұмыстары жүргізілуде. Оқиғаның себептері анықталып жатыр.