Атырау облысында жол апатынан көлік өртеніп кетті: төрт адам қаза тапты (видео)

Атырау облысындағы трассада Lada Priora және Toyota Camry көліктері соқтығысты. Салдарынан көліктердің бірі отқа оранған. Көз жұмғандар бар, деп хабарлайды Ішкі істер министрлігінің Telegram-дағы ресми жаңалықтар арнасы Polisia.kz.

Оқиға 17 маусым күні республикалық маңызы бар "Доссор – Құлсары – Бейнеу" трассасының 10 километрінде болған. Lada Priora мен Toyota Camry көлігі бір-бірімен соқтығысқан.

"Соқтығысқанның салдарынан Lada Priora көлігі өртеніп, 1992 жылы туған жүргізуші мен 2001 жылы туған жолаушы, сондай-ақ Toyota Camry көлігіндегі 1972 жылы туған жолаушы оқиға орнында мерт болды.

Toyota Camry көлігінің жүргізушісі 1971 жылы туған азамат алған жарақатынан ауруханада көз жұмды", – делінген хабарламада.

Сондай-ақ Ішкі істер министрлігінің мәліметінше, Toyota Camry көлігінің екі жолаушысы түрлі дене жарақаттарымен Мақат аудандық ауруханасына жеткізілген.

"Көлік жүргізушілерінен трассада басып озу ережелері мен жылдамдық бойынша шектеулерді қатаң сақтауды сұраймыз", - деп ескертті полиция қызметкерлері.

Еске сала кетейік, бұған дейін Маңғыстау облысында 10 адам, оның ішінде бес бала қаза тапқан жантүршігерлік апат туралы жазған едік.