Талдықорғандағы авиациялық базада екі әскери қызметші жарақат алып, бірі қайтыс болды

Талдықорған авиациялық базасында екі әскери қызметші жарақат алып, бірі көз жұмды. Бұл туралы Қорғаныс министрлігі Telegram-дағы ресми арнасында хабарлады.

Ведомство мәліметінше, оқыс оқиға бүгін Талдықорған авиациялық базасында жауынгерлік ұшақты ұшуға дайындау уақытында оқ-дәрілердің өздігінен қозғалып кетуі кезінде болған.

Салдарынан екі әскери қызметші зардап шегіп, олардың біреуі алған жарақаттарынан қайтыс болған.

Министрліктің хабарлауынша, екінші әскери қызметшіге барлық қажетті медициналық көмек көрсетілуде. Сондай-ақ тергеу іс-шаралары жүргізілуде.

"Тергеу мүддесіне сәйкес өзге ақпараттар жария етуге жатпайды. Қарулы күштердің қолбасшылығы мен жеке құрамы қаза тапқан әскери қызметшінің туыстары мен жақындарына қайғырып көңіл айтады", - делінген хабарламада.