Құтқарушылар тауда аяғын сындырып алған әйелді құтқарды

Республикалық жедел-құтқару жасағының тобы тауда аяғын сындырып алған 38 жастағы әйелге көмек көрсетті, деп хабарлайды Төтенше жағдайлар министрлігі ресми сайтында.

ТЖМ мәліметінше, 10 қыркүйек күні сағат 16:15-те РЖҚЖ (Республикалық жедел-құтқару жасағы) жасағына Алматы облысы Жамбыл ауданы Арасан-Қорасан шатқалында 38 жастағы әйелдің аяғын сындырып алғаны туралы хабарлама келіп түскен.

Оқиға орнында жедел жәрдем қызметкерлері болған, бірақ олар зардап шегушіні тасымалдай алмаған. Сондықтан РЖҚЖ тобы көмекке жіберілген.

"Отряд базасынан оқиға орнына дейінгі қашықтық – 124 шақырым. Сағат 18:47-де топ шақыру орнына және 15 минуттан кейін зардап шеккен адамға келіп жетті", - дейді ТЖМ өкілдері.

Тау-кен құтқару зембілінің көмегімен құтқарушылар әйелді жедел медициналық жәрдем көлігіне дейін тар, тік жолмен тасымалдаған. Оны таудан түсіру үшін шамамен екі сағат уақыт кеткен.

Осы орайда ТЖМ құтқарушылары тауға бір күнге болса да шығатын туристерге таулардағы қауіпсіз жүріс-тұрыс қағидаларын зерттеуі керектігін еске салды.