"Бірнеше метрге сүйреп әкеткен": Алматы облысында жасөспірім алты оқушыны қағып кетті (видео)

Алматы облысында көлік тізгіндеген 15 жастағы жасөспірім 6 оқушыны қағып кетті. Салдарынан әр түрлі жарақат алған бес жасөспірім ауруханаға жатқызылды, деп хабарлайды облыстық полиция департаментіне сілтеме жасаған KAZ.NUR.KZ.

Оқиға орнынан түсірілген видео әлеуметтік желіде пайда болды. Кадрдан Subaru көлігінің жеке үйдің қоршауы мен тротуардың арасында тұрып қалғанын, сондай-ақ патрульдік полиция қызметкерлерін көруге болады.

Жазба авторының мәліметінше, жол апаты Нарынқол ауылында болған.

"Жүргізуші куәлігі жоқ 10-сынып оқушысы көлік тізгініне отырып, бар жылдамдықпен оқушы қыздарды қағып, бірнеше метрге сүйреп әкеткен. Оқушы үш қыздың жағдайы ауыр – түрлі жарақат алған, олардың бірі менің сіңілім, қазір оларды тасымалдауға болмайды, бірақ ауылда білікті дәрігерлер де жоқ", - делінген хабарламада.

Бұл жайтқа қатысты пікір білдірген Алматы облыстық полиция департаменті аталмыш факті Қылмыстық кодекстің 345-бабы 2-бөлігі бойынша (жаяу жүргіншілерді қағып кету дерегі бойынша) полицияда тіркелгенін мәлім етті.

"21 қыркүйекте Райымбек ауданының полиция бөліміне Нарынқол ауылында Subaru көлігін тізгіндеген 15 жастағы жасөспірім рөлді басқара алмай, тротуарға шығып кетіп, жаяу жүргіншілерді қағып кеткені туралы хабарлама келіп түскен.

Оқиға салдарынан 2008 жылы туған алты бала зардап шеккен, оның бесеуі әр түрлі дене жарақатымен ауруханаға жатқызылған. Қазіргі уақытта сараптама тағайындалып, тергеу амалдары жүріп жатыр", - деп хабарлады ведомствоның баспасөз қызметі.

Полиция көлік оқушының ағасына тиесілі екенін, оны жасөспірім сұрамай алып, дүкенге айдап кеткенін атап өтті. Автокөлік арнайы автотұраққа қойылған.

Посмотреть эту публикацию в Instagram

Публикация от Instagram

Мәтіннен қате тапсаңыз, бізге жазыңыз