Түркістанда мешіт кілемдерін ұрлады деген күдікті анықталды

Түркістан облысының полицейлері мешіттегі кілемдерді қолды қылған күдіктіні тапты. Бұл туралы ведомствоға сілтеме жасаған KAZ.NUR.KZ.

"Жедел-іздестіру іс-шаралары кезінде Сарыағаш аудандық полиция бөлімінің қызметкерлері мешітте ұрлық жасады деген күдікпен 51 жастағы жергілікті тұрғынды анықтады", - делінген хабарламада.

Полицейлердің мәлімдеуінше, күдікке ілінген әйел түнгі сағат 01:00 шамасында мешіттердің біріне барып, төсеулі тұрған екі бірдей кілемді ұрлап кеткен.

Тәртіп сақшылары күдікті әйелден ұрланған айғақ заттарды тәркілеген.

Қазір полицейлер әйелдің осыған ұқсас қылмыстарға қатысы бар-жоғын тексеріп жатыр.