Қарағанды облысындағы танымал кәсіпкердің өлімі: желіде жол апатының видеосы жарияланды

Желіде Қарағанды облысындағы тасжолдағы апаты болған жерден видео жарияланды. БАҚ-тың хабарлауынша, танымал кәсіпкер Петр Васильченко қайтыс болды. Бұл туралы KAZ.NUR.KZ хабарлайды.

Кадр Instagram желісіндегі dorogi_karagandy парақшасында жарияланған. Жазбаның астында видеоның Васильченко қайтыс болған апат орнында түсірілгені айтылады.

Кадрлардан "ГАЗель" көлігі мен жолаушылар көлігінің аударылып қалғаны көрінеді. Соқтығыс салдарынан көліктердің бірі өртенген: видеода көліктен қара түтін шығып жатыр.

Қарағанды облысының полиция департаменті NUR.KZ тілшісіне желіде тараған видеоның кәсіпкер Васильченко қайтыс болған жол апатынан екенін растады.

"23 ақпан күні сағат 12:30-да Ақшатау ауылынан 10 км жерде Mercedes-AMG GLS 63 және ГАЗель маркалы екі көлік соқтығысып, жол-көлік оқиғасы орын алды. Оқиға салдарынан Mercedes-AMG GLS 63 жүргізушісі оқиға орнында көз жұмды, оның жолаушысы медициналық мекемеге жеткізілді. "ГАЗель" көлігі толығымен жанып кеткен. Аталған факт бойынша сотқа дейінгі тергеу басталды. Тиісті сараптамалар тағайындалды", - деп түсіндірді облыстық полиция департаментінің баспасөз қызметі.

Бұған дейін Қарағандыда екі көліктің соқтығысуы салдарынан нан комбинатының негізін қалаушысы қайтыс болып, әйелі ауруханаға түскені хабарланған еді.

"Вечерний Караганда" Telegram-арнасының хабарлауынша, Қарағандыдағы "Орион" нан өнімдерін шығаратын ірі компанияның негізін қалаушы әрі директоры Петр Васильченко Mercedes көлігін тізгіндеген. Екі жыл бұрын ол "Балхаш Нан" нан комбинатын да сатып алған.