Алматы облысындағы колонияда ток соққан ер адам қаза тапты

Алматы облысындағы колонияда жөндеу жұмыстары кезінде штаттағы электршіні ток соғып, мерт болды. Бұл туралы Алматы қаласы, Алматы және Жетісу облыстары бойынша қылмыстық-атқару жүйесі департаментіне сілтеме жасаған KAZ.NUR.KZ хабарлайды.

Ведомствоның баспасөз қызметінің хабарлауынша, 21 ақпанда №57 мекемеде жөндеу жұмыстары кезінде штаттағы электршіні ток соққан.

"Қылмыстық-атқару жүйесі қызметкерлері дереу алғашқы медициналық көмек көрсетіп, жедел жәрдем шақырды, сәлден кейін азаматтың қайтыс болғаны расталды. Бұған қоса штаттағы электрші бұл мекемеде жазасын өтеп жатқан сотталушы емес екенін хабарлаймыз", - деп атап өтті Қылмыстық-атқару жүйесі департаментінің өкілдері.

Бұл факт Қонаев полиция басқармасының Ақпараттық есепке алу және Сотқа дейінгі тергеп-текерудің бірыңғай тізілімінде тіркелді.

Сондай-ақ мекеме Алматы облысының еңбек инспекциясы бойынша басқармасына комиссиялық тексеруге материалдар жіберген.