Таразда жолаушылар автобусы өртенді (фото)
Опубликовано:
Тараз қаласында жолаушылар автобусы өртенді. Өрттен зардап шеккендер мен қаза болғандар жоқ, деп хабарлайды Жамбыл облыстық ТЖД-ға сілтеме жасаған KAZ.NUR.KZ.
Өңірлік ТЖД-ның мәліметінше, 2024 жылғы 26 наурызда сағат 17:43-те Жамбыл облыстық ТЖД-ның күштер мен құралдарды жедел басқару орталығының телефонына Тараз қаласы, Мәмбет батыр көшесінің бойында жолаушылар автобусының өртеніп жатқаны туралы хабарлама келіп түскен.
Шақырту орнына төтенше жағдайлар департаментінің күштері мен құралдары (жеке құрамнан 16 адам және 4 техника) жедел жеткен.
Өрт сөндірушілердің күшімен өрт 18:00-де ауыздықталып, 18:06-да жойылған. Өрттен зардап шеккен және қаза болған адамдар жоқ. Өрттің шығу себебі анықталуда.
Осы орайда Жамбыл облыстық төтенше жағдайлар департаментінің өкілдері өңір тұрғындарынан қауіпсіздік шараларын сақтауды сұрайды.
Айта кетейік, бұған дейін Жамбыл облысындағы Қаратас ауылында қора өртеніп, 48 бас мал қырылған еді.
Мақаланың түпнұсқасы: https://kaz.nur.kz/accidents/2073690-tarazda-zolausylar-avtobusy-ortendi-foto/
