Ақтөбе облысында қорқынышты жол апатынан 8 шетелдік қаза тапты (видео)

Ақтөбе облысында жол апатынан 8 шетелдік қаза тапты. Оқиға 3 сәуірде Самара-Шымкент автожолында Маржанбұлақ ауылының маңында болған. Бұл туралы KAZ.NUR.KZ ІІМ-нің ресми ақпараттық ресурсына сілтеме жасап хабарлайды.

"Volvo жүк көлігі мен Өзбекстан Республикасы азаматының басқаруындағы Toyota Аlhpard минивені ұшыраған жол-көлік оқиғасы болды. Апат салдарынан минивен жүргізушісі мен 7 жолаушысы – барлығы Өзбекстан Республикасының азаматтары – оқиға орнында қаза тапты", - делінген хабарда.

Алдын ала мәліметтер бойынша, қозғалыс кезінде жүк көлігінің дөңгелегі жарылған және соның салдарынан жүргізуші көлікті бақылай алмай, қарсы бағыттағы қозғалыс жолағына шығып, соқтығысуға жол берген.

Жол-көлік оқиғасы фактісі бойынша сотқа дейінгі тергеп-тексеру басталды. Тиісті сараптамалар тағайындалды.

"Полиция департаменті жүргізушілерді көліктің жай-күйін бақылауда ұстауға, жол ережелерін қатаң сақтауға шақырады", - дейді полицейлер.