Атырау облысында 10 жастағы қыз бассейнге батып, көз жұмды: полицейлер қылмыстық іс қозғады

Атырау облысында 14 шілдеде түстен кейін "Мұнайшы" стадионындағы бассейнге 10 жасар қыз батып кетті. Қайғылы оқиғаға қатысты облыстық полицейлер түсініктеме берді, деп хабарлайды KAZ.NUR.KZ.

Telegram-дағы Atyrau Online арнасында, жексенбіде, 14 шілдеде қыз кәмелетке толмаған сіңлісімен бірге "Мұнайшы" спорт кешенінің бассейніне барған. Олар сағат 16:00-17:00 аралығындағы сессияға бірреттік билет алған.

"Олар тереңдігі 1 метр болатын балалар бассейнінде жүрген. Белгісіз себептермен жеткіншек тереңдігі 2,5 метр болатын ересектерге арналған бассейнге түскен", - деп мәлімдеді басылымға "Мұнайшы" орталық бассейн әкімшілігінің өкілдері.

Арнадағы мәлімет бойынша төтенше жағдай болған спорт кешенінде 600-ден астам бала су спортымен айналысады. Бассейн 2019 жылы олимпиадалық стандарттарға сай қайта жаңартылып және сегіз жолаққа бөлінген.

Арна дереккөзінің ақпаратына сәйкес, қазір бассейн жабылып, қызметкерлерден жауап алынып жатыр.

Атырау облыстық ПД баспасөз қызметі KAZ.NUR.KZ тілшісіне ақпаратты растады.

"14 шілдеде сағат 16:30 шамасында "Мұнайшы" стадионындағы бассейнде қаза болған 10 жасар оқушының өліміне қатысты қылмыстық іс қозғалып, жан-жақты тергеу амалдары жүргізіліп жатыр. Басқа ақпарат тергеу мүддесі үшін жария етілмейді", - деп хабарлады облыстық ПД баспасөз қызметі өкілдері.