Теміртауда алты жасар бала алтыншы қабаттың терезесінен құлап кетті

Бүгін Теміртау қаласында алты жасар бала көпқабаттағы үйдегі пәтердің терезесінен құлап, мерт болды. Бұл туралы Төтенше жағдайлар министрлігіне сілтеме жасаған KAZ.NUR.KZ хабарлайды.

Ведомствоның Telegram-дағы ресми арнасында жарияланған ақпаратқа сүйенсек, ересектердің қарауынсыз қалған 2018 жылғы бала 6-қабаттағы пәтердің терезесінен құлаған.

"Бала алған жарақаттарынан сол жерде қайтыс болды", - делінген ТЖМ хабарламасында.

Көпқабатты үйлердің терезелерінен балалардың құлауына байланысты жазатайым оқиғалардың алдын алу мақсатында ТЖМ мынаны ескертеді:

• Балаларды қараусыз қалдырмаңыз!
• Балалар бар пәтерлердің терезелерін арнайы қорғаныс құрылғыларымен жабдықтаңыз!
• Баланың өздігінен ашып алуына жол бермеу үшін терезе тұтқаларын құлыптаңыз!
• Ешқашан москит торларын қолданбаңыз – балалар cоларға сүйенемін деп құлайды!
• Баланың терезеге шығуына жол бермеу үшін жиһаздың барлық түрін терезелерден алыс орналастырыңыз!

Айта кетейік, бұған дейін Алматыда үш жасар бала көпқабатты үйдің 13-қабатының терезесінен құлап, қаза тапқанын жазған едік.

Ал Шымкентте жыл басынан бері бес бала көпқабатты үйдің терезесінен құлаған, төртеуі жараланып, біреуі мерт болды.