"Тамаққа еш қатысы жоқ": Маңғыстаудағы мектеп оқушыларының улануының мән-жайы белгілі болды

Бейнеу аудандық ішкі саясат, мәдениет, тілдерді дамыту және спорт бөлімі мектеп оқушыларының жаппай улануына қатысты пікір білдірді, деп хабарлайды Lada.kz.

Бұған дейін Бейнеуде бір мектептің 16 оқушысы уланған болатын.

Ведомстводағылар уланудың мектеп асханасына еш қатысы жоқ деп есептейді.

Бейнеу аудандық ішкі саясат, мәдениет, тілдерді дамыту және спорт бөлімінің басшысы Тұралы Жолышовтың айтуынша, мектеп оқушыларының асханадағы тамақ немесе ауыз судан улануы себеп болды деуге негіз жоқ. Жұмағали Қалдығараев атындағы мектептің бір күн бұрын іші ауыратынын айтып шағымданған 16 оқушының барлығы мектеп асханасында түскі ас ішпеген.

"Тамаққа ешқандай қатысы жоқ, өйткені мұндай жағдайға тап болған 16 баланың бәрі де асханадан тамақтанбайды, яғни олар мемлекеттен көмек алмайтын отбасылардан. Бұл 5-7 сынып оқушылары", - деді Жолышов.

Оның айтуынша, мектептегі асхана мөрленген. Бүгін Маңғыстау облысының денсаулық сақтау басқармасы Бейнеу аудандық санитарлық-эпидемиологиялық қадағалау басқармасының мамандары білім ошағынан тамақ пен ауыз судан сынама алып, сараптамаға жібергенін хабарлады.

Еске сала кетейік, бұған дейін Маңғыстау облысындағы мектептердің бірінде балалар жаппай уланып қалған болатын. Олардың ата-аналары шағым түсірген. Бесшоқы ауылындағы 1-сынып оқушысының туыстарының бірі айтқандай, №8 мектепте бірінші ауысымдағы 1-4 сынып оқушылары асханада жаппай уланған.

Кейінірек Маңғыстау облысында тағы 16 оқушы дәрігер көмегіне жүгінген: мамандар олардың жағдайын айтты.