Астанадағы жекеменшік үйдегі өрттен төрт бала қаза тапты (фото)

Астанадағы жекеменшік үйдегі өрттен төрт бала қаза тапты. Бұл туралы KAZ.NUR.KZ елордалық ТЖМ өкілдеріне сілтеме жасап хабарлайды.

ТЖМ-нің Instagram-дағы парақшасында жарияланған ақпаратқа сәйкес, 17 қарашаның таңында екі қабатты жеке үйдің шатыры өртеніп, содан кейін ішінара құлаған.

Өрт кезінде төрт бала қаза тапты. Олардың жасы 2-ден 13 жасқа дейін болған — 2011, 2015, 2021 және 2022 жылдары туған.

"Құтқарушылар хабарлама түскеннен кейін алты минутта келіп, ашық жалынды анықтады. Өрт шамамен 500 шаршы метр аумақта оқшауланып, толық сөндірілді", - деп хабарлады ТЖМ өкілдері.

Өрттің себебі анықталып жатыр. Сот-медициналық сараптама тағайындалды.

Оқиға орнында зерттеу жүргізетін өрт зертханасы жұмыс істеп жатыр. Қаза тапқандардың жақындарына Төтенше жағдайлар министрлігі мен Апаттар медицинасы орталығының психологтары көмек көрсетіп жатыр.

Астана әкімдігі туыстарына көңіл айтып, оларға материалдық, тұрғын үй және басқа да қажетті көмек көрсетілетініне сендірді. Аман қалған екінші отбасы уақытша баспанаға орналастырылды. Әкімдік қызметкерлері зардап шеккендердің туыстарымен байланыста.