4 бала қаза тапқан өрт оқиғасы: әкімдік зардап шеккен отбасыларға көмек көрсетеді

Астанада төрт бала қаза тапқан өрт оқиғасынан зардап шеккен отбасыларға тиісті көмек көрсетіледі. Бұл туралы елорда әкімдігіне сілтеме жасаған KAZ.NUR.KZ хабарлайды.

Әкімдік өкілдерінің мәлімдеуінше, шатыры жартылай опырылып, өрт болған жекеменшік екі қабатты үйде екі отбасы тұрған. Астана әкімдігі оларға қажетті көмек көрсетеді.

"Құрбан болған зардап шеккен отбасыға психологиялық көмек беріледі. Оларға материалдық, тұрғын үй және басқа да қажетті көмек көрсетіледі. Туыстарына қайғыра көңіл айтамыз. Құрбан болмаған екінші отбасы уақытша баспанаға орналастырылды. Әкімдік қызметкерлері отбасыларымен тұрақты байланыста, барлық қажетті көмек көрсетіледі", - делінген Telegram-каналдағы хабарламада.

Айта кетейік, бұған дейін Астанада жекеменшік үйдегі өрттен төрт бала қаза тапқанын хабарлаған болатынбыз. Олардың жасы 2-ден 13 жасқа дейін болған — 2011, 2015, 2021 және 2022 жылдары туған.