Абай облысы ПД Көші-қон қызметінің басшысы ұсталды: Антикор жаңа деректерді бөлісті

Абай облыстық полиция департаментінің Көші-қон қызметі басқармасы басшысының ұсталуына қатысты жаңа деректер шықты. Жаңа мәліметтерді Антикор Telegram-дағы ресми арнасында бөлісті.

Сыбайлас жемқорлыққа қарсы қызметтің мәліметінше, Абай облыстық полиция департаментінің Көші-қон қызметі басқармасының басшысы мен Абай облыстық полиция департаментінің қызметкерлері жемқорлық күдігіне ілінген.

"Лауазымды тұлға өзінің қызметкері арқылы аудандық полиция бөлімшесінің қызметкерін қалалық көші-қон қызметі бөліміне ауыстыруға жәрдемдескені үшін 1000 АҚШ доллары көлемінде пара алған.

Күдіктілер ұсталып, уақытша ұстау изоляторына қамалды. Сотқа дейінгі тергеу жалғасуда", - делінген хабарламада.

Антикор Қылмыстық-процестік кодекстің 201-бабына сәйкес тергеу мүддесі үшін өзге ақпарат жария етілмейтінін атап өтті.

Естеріңізге сала кетейік, бұған дейін Абай облыстық полиция департаментінің Көші-қон қызметі басқармасының бастығы Гүлвира Дөненбаеваның ұсталғаны туралы ақпарат пайда болған еді.

Бұл ақпаратты Сыбайлас жемқорлыққа қарсы іс-қимыл агенттігі растап, толық мәліметті кейінірек ұсынатынын хабарлаған болатын.

Мәтіннен қате тапсаңыз, бізге жазыңыз