ҰҚК Алматыдағы екі жасырын зертханадан жарты млрд теңгеге жуық есірткі тәркіледі (фото)

Алматы қаласы бойынша ҰҚК департаменті мегаполистегі синтетикалық есірткінің екі ірі жасырын өндірісін жою бойынша операцияларды өткізді, деп хабарлайды комитеттің Telegram-дағы ресми арнасына сілтеме жасаған KAZ.NUR.KZ.

Алматы қаласы бойынша ҰҚК департаменті психотропты заттарды дайындады және сатты деген күдікпен үш азамат ұстады.

Тінту кезінде 21 кг "мефедрон" және "альфа-РVР", прекурсорлардың ірі партиясы мен зертханалық жабдықтар анықталған

"Тәркіленген есірткі заттардың құны "қара" нарықта 420 млн теңгеге бағаланады, ал көлемі 85 000 рет қабылданатын мөлшерлемелерді құрайды", - делінген хабарламада.

Құзырлы орган материалдар Қылмыстық кодекстің 297-бабы 3-бөлігі бойынша Сотқа дейінгі тергеп-тексерудің бірыңғай тізіліміне тіркеліп, соттың санкциясымен ұсталғандарға қамауда ұстау түріндегі бұлтартпау шарасы қолданылғанын атап өтті.

ҰҚК өзге ақпараттар Қылмыстық-процестік кодекстің 201-бабы 1-бөлігіне сәйкес жария етуге жатпайтынын жеткіздіү

Биыл 9 айда ҰҚК 30 халықаралық және аумақтық есірткі арналарының, сондай-ақ 29 есірткі өндіретін зертханалар іс-әрекетінің жолын кескенін атап өтті.

Мәтіннен қате тапсаңыз, бізге жазыңыз