СҚО-да мас күйде көлік жүргізген ауыл әкімі ұсталды

Солтүстік Қазақстан облысында Возвышен ауылдық округінің әкімі Қанат Тоқпанов мас күйінде рөлге отырғаны үшін әкімшілік жауапкершілікке тартылды. Оны жұмыстан шығару ұсынылды, деп хабарлайды ҚазАқпарат.

Агенттік мәліметінше, әдеп жөніндегі кеңес отырысында әкімнің тәртібі талқыланды. Мемлекеттік қызметті бақылау бөлімінің бас маманы Абзал Оразымбетовтің айтуынша, ауылдық округ басшысына қатысты қызметтік тексеру жүргізілді.

Тексеріс қорытындысы бойынша шенеуніктің көлікті мас күйде тізгіндегені үшін әкімшілік жауапкершілікке тартылғаны расталды. 2 мамырда жұмыс уақытында Қанат Тоқпанов сыра ішіп, қызметтік көлікпен қала маңындағы жолдың бойымен жүрген.

Әкімді полиция қызметкерлері тоқтатып, медициналық тексеруге жіберді. Олар шенеуніктің аздап мас болғанын анықтады. Ол 15 тәулікке қамауға алынып, жеті жылға жүргізуші куәлігінен айырылды. Қанат Тоқпанов өз кінәсін мойындап, сот шешіміне қарсы шықпаған.

Жиында көпшілік дауыспен Ғабит Мүсірепов атындағы аудан әкіміне Қанат Тоқпановты қызметінен босату ұсынылды.

Мәтіннен қате тапсаңыз, бізге жазыңыз