Шымкентте психотроптық затты сақтаған азамат 10 жылға бас бостандығынан айырылды

Шымкентте психотроптық затты сақтаған азамат 10 жылға бас бостандығынан айырылды. Ол үшінші мегаполиске бара жатқанда ұсталған, деп хабарлайды Otyrar.kz.

Шымкент қаласының қылмыстық істер жөніндегі мамандандырылған ауданаралық сотында Қылмыстық кодекстің 297-бабы 3-бөлігі 1, 3, 5-тармақтары (электрондық ақпараттық ресурстарды пайдалану арқылы, алдын ала сөз байласқан адамдар тобы болып, аса ірі мөлшердегі психотропты затты өткізу мақсатында заңсыз сақтау, тасымалдау) бойынша айыпталған азаматқа қатысты қылмыстық іс ашық сот отырысында қаралды.

Сотталушы 2024 жылдың қаңтар айында Telegram әлеуметтік желісіндегі парақшаға тіркеліп, сол сайттан Астана қаласынан аса ірі мөлшердегі психотроптық затты Алматы қаласына алып келіп, өзінде сақтаған.

Содан Toyota Camry автокөлігін жалдап, Шымкент қаласына қарай жолға шыққан. Жолда полиция қызметкерлері аталған автокөлікті тоқтатып, оның жүк салғышын тексеру барысында сөмкеден аса ірі мөлшердегі психотроптық затты тапқан.

"Прокурор П.-ға бас бостандығынан айыру жазасын тағайындауды сұрады. Сотталушы әрекетін толығымен мойындап, оған жеңіл жаза тағайындауды өтінді. Сот П.-ны Қылмыстық кодекстің 297-бабы 3-бөлігі 1, 3, 5-тармақтарына сәйкес кінәлі деп танып, оған қылмыстар жиынтығы бойынша 10 жыл мерзімге бас бостандығынан айыру жазасын тағайындады", - делінген сот хабарламасында.

Үкім заңды күшіне енген.

Мәтіннен қате тапсаңыз, бізге жазыңыз