Шымкенттегі Нұрай Серікбайдың өлімі: шара қолданбаған полиция қызметкерлері қалай жазаланады

Ішкі істер вице-министрі Санжар Әділов сенат кулуарында 21 жастағы Нұрай Серікбайдың өліміне қатысты тергеу барысы туралы айтты, деп хабарлайды KAZ.NUR.KZ тілшісі.

"Күдікті қамауға алынды, қажетті тергеу әрекеттері жүргізілуде, сот-медициналық сараптамалар тағайындалды және оның берген айғақтары оқиға орнында тексерілді. Күдікті соттың санкциясымен екі айға қамауға алынды", - деді Санжар Әділов.

Оның айтуынша, қылмыстық іс аясында барлық қажетті тергеу шаралары, істің мән-жайы бойынша жан-жақты, объективті және толық сараптама жүргізіледі.

"Өздеріңіз білетіндей, тергеп-тексеруді Шымкент полиция департаментінің жедел-тергеу тобы жүргізуде. Бұл іс бойынша орталық аппараттан – қылмыстық полиция департаментінен және тергеу бөлімінен тәжірибелі басшылар тобы Шымкентке жіберілді. Біз тергеуді жіті бақылауда ұстап отырмыз", - деді ол.

Санжар Әділов аталған оқиғадан кейін президенттің тапсырмасына сәйкес, ішкі қызметтік тексеру жүргізіліп, Шымкент полиция департаментінің бастығына тәртіптік шара қолданылғанын айтты.

"Шынында да, БАҚ-қа түсініктеме бергеніміздей, қызметтік тексеру нәтижелері бойынша, президенттің тапсырмасына сәйкес, Ішкі істер министрлігі Шымкент полиция департаментінің бастығына тәртіптік шара қолданды, ол қызметінен босатылды. Оның бірінші орынбасары да қызметінен босатылды", - деді вице-министр Санжар Әділов.

Вице-министрдің айтуынша, арыз қабылдамаған полиция қызметкерлерінің салғырттығына қатысты да іс қозғалды. Іс қозғау бойынша шара қолданбаған және жәбірленушінің шағымын қарамаған лауазымды тұлғалар да қызметінен босатылды.

Мәтіннен қате тапсаңыз, бізге жазыңыз