Жаңаөзенде дәрігер аурухана дәлізінде алған пышақ жарақатынан көз жұмды

Жаңаөзенде 29 жастағы терапевт-дәрігер аурухана дәлізінде пышақ жарақатынан көз жұмды. Қайғылы жағдайдың марқұмның қызметіне қатысы жоқ екені айтылуда, деп хабарлайды KAZ.NUR.KZ.

Маңғыстаулық журналист Айсұлу Дүтбаева Facebook-те 28 қаңтарда Жаңаөзенде болған оқиғаны баяндап, жазба жариялады

"Жаңаөзен қаласы. Бүгін, шамамен сағат 14:00-де, терапевт-дәрігерге шабуыл жасалды. Ер адам оны пышақпен ауыр жарақаттады. Әріптестері оны құтқарып қалу үшін соңына дейін арпалысты, өкінішке қарай, дәрігер алған жарақатынан көз жұмды.

Алдын ала мәлімет бойынша, оқиғаның марқұмның кәсіби қызметіне және оның медициналық мекемедегі жұмысына ешқандай қатысы жоқ. Оқиға тұрмыстық сипатта болған. Бейресми ақпарат бойынша және куәгерлердің айтуынша, оған қызғаныш себеп болуы мүмкін

Сондай-ақ күдікті мұнай өнеркәсібінде жұмыс істегені туралы айтылуда. Оның әйелі сол ауруханада медбике болып жұмыс істейді. Құқық қорғау органдары оқиғаның мән-жайын тексеріп жатыр. Қайтыс болған дәрігер 29 жаста болған", - деп жазды журналист.

Оқиғаға қатысты Маңғыстау облысының полиция департаменті түсінік берді.

28 қаңтарда Жаңаөзен қаласында 29 жастағы ер адам пышақ жарақатынан қайтыс болды. Кісі өлтірді деген күдікті уақытша ұстау изоляторына қамалды.

Алдын ала тергеп-тексеру нәтижесі бойынша, екі адам арасындағы жанжал тұрмыстық даудан туындаған. Оқиғадан кейін күдікті Жаңаөзен полиция бөліміне өз еркімен келіп, қылмысын мойындады.

Полиция Қылмыстық кодекстің 99-бабының 1-бөлігі бойынша қылмыстық іс қозғады. Оқиғаның барлық мән-жайын жан-жақты, толық және объективті тергеп-тексеруді қамтамасыз ету үшін тергеу шаралары жүргізілуде", - делінген полиция хабарламасында.

Мәтіннен қате тапсаңыз, бізге жазыңыз