Ресейде диверсия жасады деген күдікпен Қазақстанның екі азаматы ұсталды

Ресейде 2006 жылы туған екі Қазақстан азаматы диверсия жасады деген күдікпен ұсталды, деп хабарлайды KAZ.NUR.KZ Ленинград облысы соттарының біріккен баспасөз қызметіне сілтеме жасап.

Ресейдің Ленинград облысы Ломоносов аудандық соты Ресей Федерациясының Қылмыстық кодексінің 281-бабының 2-бөлігінің "а" тармағы бойынша (адамдар тобы жасаған диверсия) қылмыс жасады деген күдікпен 2006 жылы туған Қазақстан Республикасының екі азаматына қатысты сотқа дейінгі қамауға алу туралы бұлтартпау шарасын таңдады.

"Санкт-Петербургте тұратын Тараз қаласынан келген екі азамат қаржылық жағдайын жақсарту мақсатында және заңды табыс көзінің болмауына байланысты уәде етілген 40 000 рубль көлеміндегі қаржылық сыйақы үшін Ленинград облысының Ломоносов ауданындағы ұялы байланыс операторының базалық станциясының коммутаторын өртеп жіберді", - делінген хабарламада.

Таксимен қашып кетуге тырысқан аталған тұлғаларды оқиға орнына жақын жерден құқық қорғау органдарының қызметкерлері ұстады.

Ресей Федерациясының Қылмыстық кодексінің жоғарыда аталған қылмыс бойынша тиісті бабына сәйкес құқықбұзушыға 12 жылдан 20 жылға дейін бас бостандығынан айыру түрінде жаза көзделген.

Мәтіннен қате тапсаңыз, бізге жазыңыз