TikTok-та қаралым үшін некеге тұруға мәжбүрлеу туралы жалған видео жариялаған әйел жазаланды

Алматы облысының Қарасай ауданында TikTok желісіне өзін алып қашып кетіп, некеге тұруға мәжбүрлегені туралы видео жариялаған бойжеткен айыппұл арқалады, деп хабарлайды KAZ.NUR.KZ облыстық соттың баспасөз қызметіне сілтеме жасап.

Алматы облысының Қарасай ауданаралық сотында Әкімшілік құқық бұзушылық туралы кодекстің 456-2-бабының 3-бөлігі бойынша К. есімді әйелге қатысты әкімшілік іс қаралды.

Сот мәліметінше, ол 2026 жылдың 15 қаңтарында TikTok желісінде ұрлап кету фактісі болғаны жөнінде бейнежазба жариялаған.

"Аталған бейнежазба әлеуметтік желіде таралып, қызды мәжбүрлеп некеге тұрғызу белгілері бар бейнематериал ретінде ұсынылған. Сот отырысында К. өз кінәсін толық мойындап, бейнежазбаны көп қаралым жинау мақсатында салғанын, жасаған әрекетіне өкінетінін түсіндірді", - делінген сот хабарламасында.

Сот қаулысымен ол Әкімшілік құқық бұзушылық туралы кодекстің 456-2-бабының 3-бөлігі бойынша кінәлі деп танылып, 20 АЕК мөлшерінде әкімшілік айыппұл салынды.

Мәтіннен қате тапсаңыз, бізге жазыңыз