Гвардейск гарнизонындағы әскери бөлімде болған оқиға: төрт лауазымды тұлға қызметінен босатылды

Гвардейск гарнизонындағы әскери бөлімде болған оқиғадан кейін әскери бөлім командирі мен тағы үш офицер қызметінен босатылды, деп хабарлайды Қорғаныс министрлігіне сілтеме жасаған KAZ.NUR.KZ.

Ведомствоның мәліметінше, Гвардейск гарнизонындағы әскери бөлімдердің бірінде мерзімді қызмет сарбазына дене жарақатын келтіру фактісі бойынша қылмыстық іс қозғалған. Қажетті тергеу амалдары жүргізіліп жатыр.

Бұдан бөлек, лауазымды адамдардың әрекеттеріне құқықтық баға беріліп, қызметтік тексеру жүргізілген.

Нақты айтқанда кадрлық шешім қабылданып, басшылық құрамындағы төрт лауазымды тұлға – әскери бөлім командирі, оның тәрбие және идеологиялық жұмыс жөніндегі орынбасары, батальон командирі және рота командирі қызметінен босатылған.

Әскери бөлім командирінің орынбасары – штаб бастығына, батальон командирінің орынбасарына және оның тәрбие жұмысы жөніндегі орынбасарына қызметтік әрекетке сәйкес емес деп ескерту жарияланған. Бірқатар офицер мен сержантқа қатаң тәртіптік жаза қолданылған.

"Қабылданған шаралар атқарып отырған лауазымына қарамастан, дербес және бұлтартпас жауапкершілік қағидатын көрсетеді. Қазақстан Республикасының заңына сәйкес барлық мән-жайға түпкілікті қорытынды мен құқықтық баға тергеу нәтижелері бойынша беріледі", - делінген хабарламада.

Мәтіннен қате тапсаңыз, бізге жазыңыз