"Шатыр жұлынып, ағаштар құлаған": Жамбыл облысында дүлей дауыл тұрды

Жамбыл облысында дүлей дауыл тұрып, көпқабатты үйдің шатырын жұлып әкетті. Секундына 28 метр жылдамдықпен соққан желдің екпінінен көшедегі ағаштар құлап, көліктерді басып қалды, деп хабарлайды КТК арнасы.

Телеарна ақпаратынша, дауылдан зардап шеккендер мен жарақат алғандар жоқ. Қазір қаланы қирандылардан тазарту жүріп жатыр. Ауа райының қолайсыздығына байланысты аймақтағы 4 аудан мен облыс орталығындағы оқушылар онлайнға оқуға көшірілген. Екінші ауысымда оқитын 180 мектептегі 68 мыңға жуық бала қашықтан білім алып жатыр.

Тілші мәліметінше, дүлей дауыл тұрған Қаратау қаласындағы бес қабатты үй шатырсыз қалды. Соның салдарынан тұрақта тұрған бірнеше көлік зақымдалған. Шығын көлемі белгісіз. Синоптиктердің болжауынша, оңтүстік-батыстан соққан қатты жел күз айларында тағы бірнеше рет қайталануы мүмкін.

"Шамамен таңғы тоғыз жарымда үшінші мөлтек ауданы, №37 көпқабатты тұрғын үйдің шамамен 300 шаршы метрін құрайтын шатыры ұшқан. Дауылды жел тоқтаған соң, келтірілген шығын көлемі есептеліп, дер кезінде қалыпқа келтірілетін болады", - дейді Қаратау қаласы әкімінің орынбасары Ұлан Сәрсенбек.

Дереккөз: КТК

Мәтіннен қате тапсаңыз, бізге жазыңыз