Қарағанды облысында мешіт өртенді (видео)
Опубликовано:
Қарағанды облысы Қарқаралы ауданына қарасты Томар ауылында мешіт өртенді. Өрт кешке, мешітте ешкім болмаған уақытта шыққан. Ауылдан 130 км жерде орналасқан өрт сөндіру бөлімінің құтқарушылары жетем дегенше, ғимарат шатыры толық дерлік өртеніп кеткен. Бұл туралы KAZ.NUR.KZ хабарлайды.
Instagram әлеуметтік желісіндегі 1karagandy.kz парақшасында өрт дүйсенбі күні кешке, ғимаратта ешкім болмаған уақытта шыққаны жазылған. Мешітті от бірден шарпып, қою түтін алысқа тараған.
Жергілікті тұрғындар құтқарушылар келем дегенше өртті өз күшімен сөндіруге тырысқан, бірақ күші жетпеген.
KAZ.NUR.KZ тілшісі Қарағанды облысының төтенше жағдайлар жөніндегі департаментіне хабарласып, Томар ауылындағы өрт туралы мәлімет алды.
"6 қаңтарда Қарқаралы ауданындағы Томар ауылында ауданы 165 шаршы метрлік бір қабатты мешіттің ағаштан жасалған шатыры, есік-терезесі өртенді. Оқыс оқиғадан ешкім зардап шекпеді. Өрт себебі анықталып жатыр", - деп хабарлады облыстық төтенше жағдайлар жөніндегі департаментінің баспасөз қызметі.
Айта кетейік, Алматы қаласында 8 қаңтарға қараған түні гүл сататын дүкен өртенді. Оқыс оқиғадан ешкім зардап шеккен жоқ.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/accidents/emergency/2209185-qaragandy-oblysynda-meshit-ortendi-video/