Алматыда балалар үйі аумағындағы ғимарат өртке оранды (фото)

Төтенше жағдайлар министрлігінің баспасөз қызметі Алматыда балалар үйінің аумағында орналасқан асхана өртенгенін хабарлады деп жазады KAZ.NUR.KZ.

Төтенше жағдайлар министрлігінің хабарлауынша, Алматы қаласының өрт сөндірушілері Наурызбай ауданы Алтын орда көшесі бойында орналасқан ғимараттағы өртті сөндіруге кіріскен.

"Зардап шеккендер туралы ақпарат түскен жоқ. Өртке қарсы қызмет жоғары ранг бойынша жұмыс жасауда", - делінген ТЖМ хабарламасында.

Анықталған ақпарат бойынша өрт балалар үйі ауласындағы асхана ғимаратын шарпыған.

Әкімшілік мәліметіне сәйкес, ғимаратта адамдар жоқ-тәрбиеленушілер уақтылы эвакуацияланып, қауіпсіз жерге шығарылды.

"Жағдай бақылауда: өртті сөндіруге қажет оқпандар енгізілді; судың үздіксіз жеткізілуі қамтамасыз етілді. Оқиға орнында қала ТЖД бастығы жұмысты үйлестіріп жатыр", - дейді ТЖМ өкілдері.

ТЖМ қызметкерлері асхана мен оған жапсарлас салынған үш қабатты ғимарат шатырын шарпыған өртті сөндіру үшін шатырдың жабынын ашып, объектідегі газды жедел түрде жапты.

"Жедел штаб құрылды. Сондай-ақ өрт орнына қаланың барлық шұғыл қызметі келді. Балалар үйінің тәрбиеленушілері мешіт ғимаратына орналастырылып, тамақпен қамтамасыз етілген. Оларға Апаттар медицинасы орталығы және ТЖД дәрігерлері мен психологтары қажетті көмек пен қолдау көрсетуде.

Өртті сөндіру ғимараттың құрылымы күрделі болғандықтан, сондай-ақ шатыр резеңке жабыны бар ағаш фанерден жасалғандықтан қиындай түсті. Өрт оқшауланды", - деп нақтылады ТЖМ өкілдері.

Мәтіннен қате тапсаңыз, бізге жазыңыз