"Әскерилер жол апатына түсті": Қорғаныс министрлігі желіде тараған ақпаратқа қатысты түсініктеме берді

Қазақстанның Қорғаныс министрлігі "әскерилердің жол апатына түскені" туралы желіде тараған ақпаратқа қатысты пікір білдірді. Ведомствоның мәліметінше, бұл ақпарат шындыққа жанаспайды, деп жазады KAZ.NUR.KZ.

Жол апатының кадрлары бейнеленген видео Instagram-дағы 100baksoff_almaty паблигінде жарияланған.

"Ақтөбе-Орал трассасының бойында әскери техника мен азаматтық автокөлік жол апатына түсті.

Алдын ала мәлімет бойынша, екі көліктің соғылуы салдарынан өрт шыққан. Оқиға орнында жедел қызмет қызметкерлері жұмыс істеп жатыр. Зардап шеккендер мен апат туралы ақпарат нақтыланып жатыр", - делінген хабарламада.

Ескерту! Видеода бейәдеп сөздер кездеседі. 18 жастан кіші тұлғаларға көруге кеңес бермейміз.

Қорғаныс министрлігінің баспасөз қызметі желіде тарап жатқан бұл видеоматериалдың ҚР Қарулы күштеріне еш қатысы жоқ екенін мәлімдеді.

"Тексерілмеген және шындыққа жанаспайтын мәліметтерді таратудан сақ болуды және тек қана ресми ақпарат көздеріне ғана сенуге шақырамыз", - деді ведомство өкілдері.

Мәтіннен қате тапсаңыз, бізге жазыңыз