Жамбыл облысында қатты жел: бірқатар нысанға зақым келді, әкімдік тұрғындардан үйден шықпауды сұрады (видео)
Опубликовано:
Жамбыл облысында қатты жел салдарынан бірқатар нысанға зақым келді. Аудан әкімдігі тұрғындардан аса қажеттілік болмаса, далаға шықпауды және көшеде абайлап жүруді сұрайды, деп хабарлайды KAZ.NUR.KZ.
Жамбыл облысы әкімдігінің мәліметінше, 6 ақпанда Сарысу ауданы Жаңатас қаласында екпіні 32 м/с-қа дейін жеткен қатты жел салдарынан бірқатар нысанға зақым келген.
Атап айтқанда:
- 1-шағын аудандағы №32, 33, 34, 35 тұрғын үйлердің;
- 3-шағын аудандағы №6 тұрғын үйдің;
- 4-шағын аудандағы №15 және №15 "а" тұрғын үйлердің шатырлары жартылай ұшқан.
Сонымен қатар Бейбітшілік көшесінде орналасқан ту тұғыры құлап, аудан аумағында электр жарығы уақытша сөнген.
"Қазіргі уақытта зардап шеккен азаматтар туралы ақпарат тіркелген жоқ. Оқиғаға байланысты аудан әкімдігінде жедел штаб құрылып, зерделеу және қалпына келтіру жұмыстары жүргізіліп жатыр.
Қоғамдық-саяси ахуал тұрақты. Жағдай облыс әкімінің жеке бақылауында", - делінген хабарламада.
Сондай-ақ Сарысу ауданының әкімдігі Жаңатас қаласының тұрғындарына үндеу жасады.
"6 ақпанда қатты жел соғуына байланысты, қаладағы кейбір тұрғын үйлердің шатырлары ұшуда.
Қауіпсіздікті сақтау мақсатында сіздерден аса қажеттілік болмаса, далаға шықпауларыңызды және көшеде абайлап жүрулеріңізді сұраймыз!" - делінген хабарламада.
Қаладағы ауа райының қолайсыздығына байланысты бірінші ауысымда оқитын оқушылар онлайн оқуға көшкен.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/accidents/emergency/2340354-zhambyl-oblysynda-qatty-zhelding-saldarynan-birqatar-nysanga-zaqym-keldi-video/