ШҚО-да балаларды өрттен құтқарып қалған ауыл мұғалімі марапатталды

ШҚО-да орта мектептің мұғалімі көршісінің балаларын өрттен құтқарып қалған, деп хабарлайды өңірлік ТЖД-ға сілтеме жасаған KAZ.NUR.KZ.

Ведомствоның мәліметінше, оқиға 18 қаңтарда Шығыс Қазақстан облысы Алтай ауданына қарасты Соловьёво ауылында болған.

Өз үйінің ауласында шаруашылық жұмыстарымен айналысып жүрген Рулан Сейітов Копылов көшесіндегі көрші үйдің шатырынан түтін шығып жатқанын байқап, бірден көмекке ұмтылған.

Үйдің кіреберіс есігін ашуға тырысқанымен, қою түтін басқан үйге кіру мүмкін болмаған. Осыдан кейін ол үйді айналып өтіп, екінші жағынан сынған терезені көреді. Терезе маңында көмек сұрап тұрған екі баланы байқап, оларды түтінге толы үйден терезе арқылы сыртқа, таза ауаға алып шыққан.

Даладағы ауа температурасының төмен болуына байланысты балаларды өз үйіне, жылы жерге апарып, қамқорлық көрсеткен.

Балаларды құтқарып қалған Рулан Сейітовтің бұл ерлігі елеусіз қалмай, ол Қазақстан Республикасы төтенше жағдайлар министрінің бұйрығымен "Өртте көрсеткен қайсарлығы үшін" медалімен марапатталды.

Медальды оған Шығыс Қазақстан облысы Төтенше жағдайлар департаменті бастығының міндетін атқарушы Фархат Әміре табыстады.

Айта кетейік, ерлік көрсеткен Рулан Сейітов Соловьёво орта мектебінде мұғалім болып жұмыс істейді.

Мәтіннен қате тапсаңыз, бізге жазыңыз