Жетісу облысында азық-түлік дүкенінде жарылыс болып, үш адам зардап шекті

Жетісу облысында азық-түлік дүкенінде газ-ауа қоспасы жарылып, салдарынан үш адам зардап шекті, деп хабарлайды өңірлік ТЖД-ға сілтеме жасаған KAZ.NUR.KZ.

Жетісу облыстық ТЖД-ның Facebook-тегі парақшасында жарияланған мәліметке сүйенсек, 15 ақпанда 18:45 шамасында Ескелді ауданы, Қарабұлақ ауылында орналасқан "Малика" азық-түлік дүкенінде газ-ауа қоспасы жарылған. Өрт болмаған.

Оқиға орнына Жетісу облысы ТЖД күштері мен құралдары жедел жеткен (жеке құрамнан 27 және 6 техника).

Оқиға салдарынан сыртқы қабырға мен шатырдың бір бөлігі құлап, зақымдану аумағы шамамен 36 шаршы метрдей болған.

Сондай-ақ үш адам зардап шеккен. Олар тексеруден кейін аудандық орталық ауруханаға жеткізілген. Зардап шеккендердің хәлі орташа ауыр, тұрақты деп бағаланып отыр.

Қазіргі уақытта оқиғаның мән-жайы анықталып жатыр.

Мәтіннен қате тапсаңыз, бізге жазыңыз