Сыртқы істер министрлігі "қазақстандық Таиландта жол апатынан қаза тапты" деген ақпаратты тексеріп жатыр

Қазақстанның Сыртқы істер министрлігі өкілдері Таиландтың Пхукет аралында қазақстандық азаматтың қазасы туралы деректі тексеріп жатыр. Мұндай ақпарат желіде жарияланған болатын, деп хабарлайды KAZ.NUR.KZ.

"Пхукет жаңалықтары" газеті Telegram-дағы арнасында 1 сәуірде мотоцикл жүргізушісінің жол-көлік оқиғасынан қаза тапқанын, оның қазақстандық екенін хабарлады. Басылым марқұмның жеке басын анықтады деген Vachira Phuket ауруханасына сілтеме жасаған.

"Жол апаты сағат 00:45 шамасында болды, кеш болғанына қарамастан, оқиғаның жан түршігерлік мән-жайына байланысты ақпарат тез тарап кетті. Honda Forza мотоциклінің жүргізушісінің қатты жүргені сонша, ол көшедегі жарық бағанасына соғылғаннан денесі екіге бөлініп кетті", - деп жазды Facebook-те куәгерлер.

Таң ата Kusoldharm қорының құтқарушылары апат туралы қысқаша хабарлама жариялап, марқұмның Ресей азаматы болуы мүмкін екенін айтқан. Кейінгі жазабаларда марқұмның ұялы телефонының экранында орыс тіліндегі жазу бар екені айтылған", - деп жазады басылым.

Газеттің хабарлауынша, Vachira Phuket ауруханасы марқұмның жеке басы туралы ақпаратты растаған - ол Пхукетте тұрып, жұмыс істеген Қазақстан азаматы.

NUR.KZ тілшісі Қазақстанның Сыртқы істер министрлігінің баспасөз қызметіне хабарласып, оқиға туралы ақпаратқа түсінік беруді сұрады. Министрлік өкілдері қазіргі уақытта мән-жайды анықтап, ақпаратты тексеріп жатқанын хабарлады.