Алматы облысында жантүршігерлік жол апатынан сегіз адам қаза тапты

Алматы облысында жантүршігерлік жол апаты болды. Облыстық полиция департаменті оқиға туралы толық мәлімет таратты, деп хабарлайды KAZ.NUR.KZ.

Оқиға болған жерде түсірілген кадрлар желіде жарияланды. Кадрлардан майысқан автокөліктердің қаңқасын байқауға болады.

Ведомствоның хабарлауынша, полицейлер Алматы–Бішкек тас жолының 107-ші шақырымында болған жол-көлік оқиғасы бойынша сотқа дейінгі тергеу амалдарын бастады.

Алдын ала мәлімет бойынша, Lexus қарсы бағыттағы қозғалыс жолағына шығып кетіп, Toyota Alphard көлігімен соқтығысқан.

"Жол апаты салдарынан сегіз адам алған жарақаттарынан оқиға орнында көз жұмды, екеуі ауруханаға жатқызылды", - деп хабарлады облыстық полиция департаменті өкілдері.

Қазіргі уақытта оқиғаның мән-жайын анықтау үшін барлық қажетті тергеу шаралары жүргізілуде.

Полицейлер жүргізушілерден жол ережесін қатаң сақтауды және жолда өте сақ болуды сұрайды.

Мәтіннен қате тапсаңыз, бізге жазыңыз