Гонконг вирусының қаупі бар ма: вице-министр жауап берді

Дәрігерлер қазақстандықтарды алаңдатқан Гонконг вирусының қаупі туралы айтып берді. Бұл туралы КТК телеарнасы хабарлады.

Мамандар бұл вирус басқа маусымдық вирустарға қарағанда қауіпті емес деп отыр.

Осыған байланысты денсаулық сақтау вице-министрі Айжан Есмағамбетова пікір білдірген.

"Вирустың атауы қайда шыққанына байланысты беріледі. Сіздер айтып отырған Гонконг вирусы шыққанына көп уақыт өтті. Вирустың қысқаша атауы A(H3N2), яғни А типі, оның ішінде H3N2 деген түрі. Бұл біздің елде де, әлемде де эпидмаусымда жыл сайын таралатын вирус", - деді вице-министр.

Дереккөз: КТК

Еске салайық, желтоқсанның басында Астананың бас санитария дәрігері қалада Гонконг тұмауы анықталғанын хабарлаған. Елордада ЖРВИ-мен ауырғандардың арасында А типті тұмау вирусы (H3N2 немесе Гонконг тұмауы - ред.ескертпесі) 29 науқастан байқалған.

MSD анықтамалығына қарағанда, тұмау - қызба, өткір ринит, жөтел, бас ауруы белгілері бар вирустық инфекция.

Маусымдық эпидемиялар кезінде, әсіресе қауіп тобындағы пациенттер арасында (мысалы, ұзақ мерзімді емделушілер, егде жастағы адамдар, жүрек-өкпе жеткіліксіздігі немесе жүктіліктің соңғы сатысындағылар) өлімге әкелуі мүмкін; пандемия кезінде тіпті сау жас пациенттерге де қауіпті болуы мүмкін.