Алматы әуежайында Нипах вирусы анықталған жағдайда әрекет ету шаралары пысықталды

Алматы әуежайында аса қауіпті инфекцияларды, оның ішінде Нипах вирусын анықтау және оқшаулау бойынша дайындықты тексеруге бағытталған оқу-жаттығу өтті. Бұл туралы Санитариялық-эпидемиологиялық бақылау комитетіне сілтеме жасаған KAZ.NUR.KZ хабарлайды.

Оқу-жаттығуға санитариялық-эпидемиологиялық қызметтің, жедел медициналық жәрдемнің, инфекциялық стационардың мамандары, Ұлттық қауіпсіздік комитетінің Шекара қызметі, кеден қызметі, полиция департаменті, сондай-ақ Алматы қаласының халықаралық әуежайының өкілдері қатысқан.

Сценарийге сәйкес, Нипах вирусын жұқтыруы мүмкін жолаушы анықталған. Барлық қызмет әрекеттердің толық алгоритмін – бастапқы санитариялық-карантиндік бақылау мен оқшаулаудан бастап, науқасты ауруханаға жатқызу, эпидемияға қарсы және дезинфекциялық іс-шараларды жүргізуге дейін пысықтаған.

"Оқу-жаттығулардың қорытындысы бойынша ведомствоаралық өзара іс-қимылдың жоғары деңгейдегі дайындығы мен үйлесімділігі расталды.

Қолданыстағы алгоритмдердің әлеуетті биологиялық қатерлерге жедел ден қоюға және халық үшін тәуекелдерді барынша азайтуға мүмкіндік беретіні атап өтілді. Іс-шара соңында өткізілген жұмыс кеңесінде атқарылған жұмыстар талданып, өзара іс-қимылды одан әрі күшейту бойынша ұсынымдар әзірленді.

Мұндай оқу-жаттығуларды өткізу мемлекеттік шекараның санитариялық қорғау жүйесінің маңызды элементі болып табылады және елдің санитариялық-эпидемиологиялық қауіпсіздігін қамтамасыз етуге бағытталады", - делінген хабарламада.

Айта кетелік, бұған дейін Денсаулық сақтау министрлігі Қазақстанда Нипах вирусын жұқтыру, сондай-ақ оны ел аумағына әкелу жағдайлары тіркелмегенін мәлімдеген еді.

Мәтіннен қате тапсаңыз, бізге жазыңыз