Жастардан қалыспай ерекше сәнді киінетін зейнеткер жұп көпшілікті тәнті етті

Германияда ерекше сәнді киінетін зейнеткер жұп көпшіліктің қошеметіне бөленуде деп жазады KAZ.NUR.KZ порталы.

Германия астанасы Берлинде тұратын Бритт Канья (Britt Kanja) мен Гюнтер Краббенхефт (Günther Krabbenhöft) зейнет жасына келгендеріне қарамастан, сәннен қалыспауда.

Олар ерекше сәнді киімдер киіп, қоғамдық және мәдени шараларды қалдырмауға тырысады. Тіпті бидің түбін түсіретін зейнеткерлер жүрген жерінде көпшіліктің ерекше назарына ілігеді.

Бритт те, Гюнтер де көңілдің ешуақытта қартаймайтынын дәлелдеп бергендей. Көпшілік қарт жұптың киімдері ерекше әдемі екенін атып, таңдайларын қағуда.

Айта кетсек, Гюнтер бірнеше жыл бұрын желідегі суреттерінің арқасында танымалдыққа ие болып "Хипстер ата" деген лақап атқа ие болған. Қария денінің сау болуын биге әуестігімен байланыстырады.

Аспазшы болып жұмыс істеп келген ақсақал қашан да сән әлеміне ерекше қызығушылық танытып келгенін айтуда.

Бритт қарияның қызығушылығын құптап, оған сән үлгісіне лайық киінуде барынша қолғабыс етеді. Осылайша бір-біріне демеу болып жүрген жұп көпшіліктің мақтауына ие болған.

Еске салсақ, бұған дейін әлемдегі ең қарт ерлі-зайыптылар 79 жыл жұптары жазылмауының құпиясымен бөліскенін жазған едік.

Одан бөлек, 80 жыл ішінде шашын қимаған қария 5 метрлік бұрымының қасиетті екеніне сенетінін хабарлаған болатынбыз.