Әлемдегі ең ұзын шашқа ие жасөспірімді білесіз бе

Үндістанда әлемдегі ең ұзын шашқа ие жасөспірім Гиннестің рекордтар кітабына енді деп жазады guinnessworldrecords.com.

Алты жасынан бері шашына қайшы жолатпаған Ниланши Патель жасөспірімдер арасында ең ұзын шаштың иесі атанып отыр.

Ол соңғы екі жылда өз рекордын екі рет жаңартқан. 2018 жылы оның шашының ұзындығы 170,5 сантиметр болса, 2019 жыды 190 сантметрге дейін өскен. Ал бүгінде Ниланшидің шашының ұзындығы 200 сантиметр.

Тамыз айында Ниланши кәмелет жасына толғандықтан, ендігі жерде ол өз рекордын жаңарта алмайды. Десе де 18-ге толмай тұрып жаңартқан рекордтары өзінен шашы әлдеқайда ұзын жасөспірім табылғанға дейін сақталады.

"Мен өзімді бақытты сезінемін. Мен үшін әлемдік рекордшы болу - үлкен жеңіс", - деді ол.

Белгілі болғандай, Ниланши алты жасында шаштаразшылардан көңілі қалғандықтан, шашын мүлде қимауды ұйғарған. Ал анасы қызының бұл шешіміне құрметпен қарапты.

Бүгінде анасы оның шашын апта сайын жуып, тарауға барынша көмектесіп отырады. Достары аруды ұзын шашы үшін "Рапунцель" атап кеткен екен.

Болашақта бойжеткен шашын қия ма, жоқ әлде ересектер арасында рекорд жаңартуға ұмтыла ма, әзірге белгісіз.

Еске салсақ, бұған дейін біз 42 жастағы азамат ерекше ұзын шашымен рекорд орнатқанын хабарлаған едік.

Одан бөлек, 80 жыл ішінде шашын қимаған қария 5 метрлік бұрымының қасиетті екеніне сенетінін жазған болатынбыз.