RU

Сән қуған жастар мұрынның дәл үстіне жаппай тату салдыра бастады

Тату
Фото: metztattoostudio

Жаңа сәннен қалғысы келмеген жастар жаппай мұрнына тату салдыра бастады деп хабарлайды The Sun басылымы.

Бүгінде сәннің соңғы үлгісіне сай болғысы келетіндер түрлі әрекеттерге барып жатады. Кей кездері сән жарысынан қалғысы жоқ жастар көптің таңданысын тудыратын өзгерістерге барудан да тайынбайды.

Дәл осындай тенденцияның жарқын үлгісі ретінде мұрнына жарыса тату салдырып жатқандарды мысалға келтіруге болады.

Олар мұрнының үстіне түрлі суреттерді татудың көмегімен салдырып, өз фотоларын желіге жүктеуге кіріскен.

Мұрнына тату салдырып үлгергендердің дені бұл процедураны жасау кезінде қатты ауырсыну сезімдеріне шыдау керектігін жасырмайды.

Мұрынды киім астында жасыру мүмкін еместігі де бұл дене мүшесіне тату салдырғандардың әрекетін одан бетер ақылға қонымсыз ететіндей. Мұрынды тек бетперде тағу арқылы жасыруға болатынын, ал бір салдырған тату оңайлықпен кете қоймайтынын ескерсек, мұндай тату салдыруға көпшілік қызыға қоюы екіталай деген ой келеді.

Десе де сән үлгісіне сай болғысы келгендерді мұндай қиындықтар тоқтатып отырған жоқ. Желіде мұрнына тату салдырғандардың суреті күн санап көбейіп жатыр. Олар өз суреттерін ел назарына ұсынып, жұрттың түрлі пікірлеріне ие болуда.

Тіпті, егде жастағы адамдар да сәннен қалыспай, трендті қайталауға кіріскен.

Ал сіз мұндай жаңа трендке қатысты қандай пікірдесіз?

Мақаланың түпнұсқасы: https://kaz.nur.kz/kaleidoscope/1893979-sn-kugan-zastar-mrynny-dl-stine-zappaj-tatu-saldyra-bastady/