"Мүмінді қарғау оны өлтіргенмен тең": Адамға қарғыс, лағнет айтудың үкімі қандай

Кейде адамдар ашу үстінде бір-біріне лағнет айтып, қарғап жатады. Бұның дұрыс және бұрыстығына қатысты Қазақстан мұсылмандар діни басқармасының Шариғат және пәтуа бөлімі жауап берді.

"Лағнет – алыстату, қуылу деген мағынаны білдірді. Егер лағнет Алла тарапынан айтылса, ол жақсылықтан алыстау, қуғындалуды, ал пенде тарапынан болса балағаттауды, жаман тілекті білдіреді. Ибн Хажар: "Лағнет – Алла Тағаланың рахметінен алыстататын жаман тілек" дейді. Пайғамбарымыз (оған Алланың салауаты мен сәлемі болсын) қарғыс айту жаман қасиет әрі шынайы мүмінге жат екенін баяндап, одан аулақ болуды өсиет еткен. Әбу Дардадан жеткен риуаятта Пайғамбарымыз (оған Алланың салауаты мен сәлемі болсын): 

"Расында пенде қарғыс айтқан кезде ол көкке көтеріледі. Сол сәтте аспанның қақпалары жабылып қалады. Сонда ол жерге түседі, бірақ оның да есіктері жабылады. Сосын ол дүние жүзін шарлап жүріп, ақыр соңында қарғыс кімге қатысты айтылса соған барады. Егер ол адам қарғысқа лайық болса соған тиеді. Ал лайық болмаса қарғыс айтқан адамның өзіне қайтады" деп айтады", - дейді ҚМДБ мамандары.

Осы ретте діни басқарма өкілдері қарғыс айту үкімдеріне тоқталды:

• Егер қарғыс жеке тұлғаға емес, жалпылай залымдарға, пасықтарға қаратылып айтылса рұқсат етіледі. Алла Тағала Құранда былай дейді: "Алланың лағнеті залымдарға тән". Ибн Хажар Һайтами: "Жеке бір тұлғаның өзін емес, сипатын атап қарғыс айтуға рұқсат етіледі", - дейді. 
• Шариғатта Әбу Ләһаб, Ібіліс секілді жеке аталып лағнеттелгендерге қарғыс айтуға болады. Ибн Муфлих: "Құран мен хадисте лағнеттелгендерге қарғыс айтуға рұқсат етіледі", - дейді.
• Жеке бір мұсылманға қарғыс айту – харам. Пайғамбарымыз (оған Алланың салауаты мен сәлемі болсын) "Мүмінді қарғау оны өлтіргенмен тең", - деген. Кейбір ғалымдар бұның мағынасын мүмінді қарғау адамды өлтіргендей күнә арқалайды деп түсіндірген". Сол сияқты Әл-Бәжайрами: "Жеке бір мұсылманды қарғау – харам. Оған жалпы мұсылмандар бірауыздан келіскен" дейді.  
• Кәпір немесе күнәһар болса да, жеке адамды қарғауға болмайды. Себебі, лағнет айту Алланың рахметінен алыстатады. Сондықтан өмірінің соңғы сәті қандай болары белгісіз адамға қарғыс айтуға болмайды. Имам Науауи: "Ақтық сәтінде қандай жағдайда болатынынан нақты хабары жоқ адамды қарғауға болмайды. Сондықтан ғалымдар: "мұсылман немесе дінсіз болса да жеке адамды лағнеттеуге рұқсат жоқ" деген. Тек шариғи деректерде дүниеден күпірлікпен өткен немесе өтетіні белгілі болған Әбу Жәһил, Ібіліс секілділердің жөні бөлек", – деген.

Осы орайда, жоғарыда келтірілген дәледерді ескере отырып, Қазақстан мұсылмандары діни басқармасы мұсылман немесе өзге дін өкілі болса да, жеке бір адамға қарғыс айтуға болмайтынын айтады.