Түйіндемеге жазылатын жеке қасиеттер: қалай дұрыс толтыру керек

Жұмыс іздеуге арналған түйіндемені толтырудан басқа кезде өзіңізді мақтау дұрыс саналмайды. Ал түйіндемеге қандай жеке қасиеттеріңізді жазған дұрыс? Педагогика ғылымдарының кандидаттары Евгений және Екатерина Полицинскийлер, мансап пен кәсіби өсу туралы кітаптардың авторы Джойс Лэйн Кеннеди түйіндемеге не жазылатынын және өзіңіз туралы мәліметтерді қалай енгізу керегін айтып берді.

Жеке қасиеттердің классификациясы, олардың әр түрлі мамандықтар үшін маңызы

Сауатты жазылған түйіндеме сұхбаттасуға шақыру және беделді компанияда қызықты жұмысқа орналасу мүмкіндігін береді. Тапсырманы шебер орындау үшін мұндай ақпараттық құжатқа жеке қасиеттерді енгізу ережелері мен ерекшеліктерін білу қажет.

Түйіндемеге арналған жеке қасиеттер қандай?

Бұл - тұлғаның туа біткен және тәрбие, даму, тұлғалық өсу процесінде қалыптасқан мінез-құлқы әрі кәсіби маман ретінде көрінетін жеке тұлғаға тән ерекшеліктері. Адамның тұлғалық қасиеттеріне не жатады? Кәсіптік міндеттерді орындау барысында және басшылықпен, ұжыммен өзара байланыс орнату кезінде ашылатын қасиеттер мен әдеттер адамның болмысын көрсетеді. Мұндай қасиеттер әдетте мынадай түрлерге бөлінеді:

• өзіне деген көзқарасы (өзін-өзі сынай білуі, еркіндік);
• әріптестерімен қарым-қатынасы (өзін-өзі бақылау, адалдық, әзілді түсінуі);
• жұмысқа қатынасы (істі орындауы, ұқыптылық);
• заттарға қатынасы (дәлдік, үнемділік).

Жеке қасиеттер әлеуеті жоғары жұмыс берушіні үміткердің барлық қажетті құзыретке ие екендігін және жұмыс беруші мен әріптестер арасында онымен ешқандай мәселелер туындамайтынына сендіру үшін көрсетіледі.

Әр түрлі мамандықтар үшін тұлғалық қасиеттердің түрлері мен мәні

Жұмыс барысындағы тапсырмаларды орындау кезінде белгілі бір қасиеттер маңызды. Мұнда әр түрлі кәсіптік салаларға қажетті мінез кескінінің мысалдары берілген:

1. Есепші – күйзеліске төзімділік, оқуға қабілеттілік, табандылық, жауапкершілік, жанжалдаспау.
2. Заңгер - ұқыптылық, кеңінен ойлану, үлкен көлемдегі ақпаратпен жұмыс істей білу.
3. Хатшы – сауатты сөйлеу, көрікті келбет, жауапкершілік, еңбекқорлық, табандылық, келіспеушіліктерден аулақ болу.
4. Сату менеджері - көрікті келбет, коммуникативтік дағдылар, стресске төзімділік, сауатты сөйлеу, оқу қабілеті.

Үміткерлер түйіндемеде жеке қасиеттерді көрсету кезінде мынадай қиындықтарға тап болады:

• Жеке қасиеттерін өз тарапынан бағалау қиынға соғады
• Егер жеке қасиеттерін асыра жазып жіберсе, рекрутер мұны байқап қояды.
• Сипаттама қысқа, мағыналы әрі қызықты болуы керек.

Түйіндемені сауатты толтырып, жақсы нәтижеге жету үшін менеджер, рекрутер және психолог секілді мамандардың кеңестері мен ұсыныстарын ескеру қажет. Жұмыс іздеу сайттары дайын үлгілер мен оны толтыру нұсқауларын ұсынады.

Түйіндемеге жеке қасиеттерді жазу ережелері

Түйіндемені дұрыс толтыру үшін тәжірибе және білім қажет. Түйіндемеде өзіңіз туралы не жазуға болатыны және болмайтыны жөнінде ұсынымдар бар.

Түйіндемеге қандай қасиеттерді енгізу керек және оны қалай дұрыс жасау керек?

Түйіндемені дұрыс жазу үшін оны қысқа және мазмұнды етіп толтыру керек. Ол үшін:

1. Бестен артық болмайтын жеке қасиетіңізді жазыңыз.
2. Вакансияда көрсетілген лауазымға сәйкес келетін ерекшеліктерді тізіңіз.
3. Басшылық лауазымға өтініш бермеген жағдайда ғана әзіл-оспақ орынды.

Кәсіби қасиеттердің біразы студенттік кезеңнен қалыптасуы керек. "Успехи современного естествознания" журналында ТПУ қызметкерлері Евгений және Екатерина Полицинский жұмыс берушілер қызметкердің мына қасиеттерін жоғары бағалайды деп жазады:

• Креативтілік және кәсіби қызметке қызығушылықтың жоғары болуы.
• Байланыс орнату, ұйымдастырушылық қабілеті.
• Жауапкершілік, бейімделу, топта жұмыс істей білу.
• Іскерлігі, бастама көтеруі.
• Сендіру, міндеттер мен істерді бөлу қабілеті.
• Жүйелі ойлау және интуиция.
• Шешім қабылдау және әрекетке итермелеу қабілеті.

Түйіндемеге қандай қасиеттерді қосуға болады? Әмбебап жеке қасиеттерге жылдам үйрену, бастама көтеру, парасаттылық пен зиянды әдеттердің болмауы жатады. Достық, ұқыптылық және сынды байсалдылықпен қабылдап, өз кемшіліктерін көре білу, педантизм мен еңбекқорлық маңызды.

Түйіндемеге қандай жеке қасиеттерді кіріктіруге болмайды?

Түйіндемеге жұмысты сәтті аяқтауға кедергі келтіретін, белгілі бір мамандық үшін теріс, ол үшін қажет емес деп саналатын жағымсыз қасиеттерді жазбаған жөн. Мына ақпараттардың түйіндемеде болмағаны абзал:

1. Жеке тұлғаның әлсіз тұстары туралы ақпарат.
2. Егер берілген талаптар тізімінде болмаса, сыртқы келбет пен дене бітімінің сипаттамасын жазудың қажеті жоқ.

Tribune Media Service баспа тобының тұрақты Career Today айдарының авторы Джойс Лэйн Кеннеди "Как составить резюме для 'чайников'" мақаласында жұмыс іздеушілер көбінесе қойылатын талаптарды оқымайтынын жазады. Ал "Лаборатория карьеры Алены Владимирской" ресурсы егер сіз жұмыстан шықсаңыз, бәсекеге төтеп бере алмасаңыз әрі кез келген нәрсені көңіліңізге тез қабылдайтын болсаңыз, бұл туралы түйіндемеге жазбауыңыз керек дейді.

Қызметтік міндетіңізге қарама-қайшы келетін қасиеттерді жазудан сақ болу керек: көпшіл болу есепші немесе жүргізуші үшін қажет емес, ал балаларға деген сүйіспеншілік тек күтуші, тәрбиеші және мұғалім лауазымына қатысты болуға тиіс.

Жұмыс көзін іздестіру кезінде жоғары білім мен жұмыс тәжірибесі ғана емес, негізгі жеке қасиеттер мен соған сәйкес лауазымдар маңызды. Бос жұмыс орнының талаптарын зерттегеннен кейін түйіндемеңізге осы лауазымға арнайы қажет кәсіби және жеке қасиеттерді енгізуді ұмытпаңыз, сонда сұхбатқа шақыру алу мүмкіндігі әлдеқайда жоғары болады.