"Жарығы күшейіп келеді": Алматыда ғалымдар жаңа 3I/ATLAS атты құйрықты жұлдызды зерттеп жатыр (видео)

Отандық астро-физиктер әлем ғалымдарымен бірге аспандағы бейтаныс құйрықты жұлдызды бақылап отыр. 3I/ATLAS кометасы бірнеше ай бұрын анықталған. Күн жүйесіне жақын ұшқан жұлдыздың шығу тегі, бағыты анықталып, құрылымы зерттеліп жатыр, деп хабарлайды 24.kz.

Құйрықты жұлдыз әлем ғалымдарының жіті бақылауында. Себебі 3I/ATLAS басқаларға қарағанда өзгеше. Нақтырақ айтсақ, өте жарық, жылдам қозғалады және түсі де бірнеше рет өзгерген.

"Бұл аспан денесі бізге бөтен жұлдыздық жүйеден келді. Сондықтан ғалымдардың назарын аударып отыр. Оның табиғаты да ерекше және ғалымдарға өзге жұлдыздық жүйелердің ерекшеліктерін зерттеуге мүмкіндік береді. Өйткені ол біздің күн жүйемізде қалыптаспаған", - дейді Фесенков атындағы астрофизика институтының кіші ғылыми қызметкері Надежда Вайдман.

Ғалымдарымыздың айтуынша, құйрықты жұлдыздың көмірқышқыл газы нормадан сегіз есе жоғары. Кометаның қазіргі қозғалысы Солтүстік Тянь-Шань тауындағы АЗТ-20 телескобымен бақыланып отыр.

"Кометаны бақылау наурызға дейін немесе одан да ұзап кетуі мүмкін. Ең бастысы, жарығының өзгеруіне қараймыз. Себебі оның жарығы күшейіп келеді. Біз осы комета арқылы өзге ғаламшар жүйесінің қалыптасуын зерттей аламыз", - дейді Фесенков атындағы астрофизика институтының аға ғылыми қызметкері Максим Кругов.

Құйрықты жұлдыз күн жүйесін көлденең кесіп өтіп барады. Бірнеше айдан кейін біздің ғаламшар жүйесінен шығып кетеді екен. Ғалымдар осы уақытты тиімді пайдаланып, өзге ғарыш денесін зерттеп жатыр.

Авторлары: Аршын Кемелжан, Айдос Қалиев

Мәтіннен қате тапсаңыз, бізге жазыңыз