Top.Mail.Ru

Сайт нұсқасы

ru kz

Зектілері

Грузиядағы ең танымал салат – ацецилиді қалай жасайды

Опубликовано:

Ацецили салаты
Анар қосылған ацецили салаты. Көрнекі сурет: YouTube / Супер келін Диана

Грузин асханасы дәмді тағамдарымен таң қалдырмай қоймайды. Әсіресе көкөністерден дайындалатын салат түрлері өте тойымды әрі пайдалы. Ацецили - таңғажайып дәмі бар грузин салаты. Құрамындағы ингредиенттер мен дәмдеуіштер салатқа ерекше дәм береді. Бұл жазбада тауық еті, баялды және болгар бұрышынан жасалатын ацецили салатының рецептін бөлісеміз.

Грузин асханасында жүздеген жылдар бойы өзіндік дәстүрлер сақталған. Грузин халқы қолжетімді өнімдерден хош иісті әрі тәбетті ашатын тағамдарды пісіруге бейім келеді. Әр түрлі көкөністен дайындалатын салаттары да ерекше. Соның бірі ретінде ацецили салатын айтуға болады.

Сипаттамасы

Асханасы: грузин

Санаты: тіскебасар

Дайындау уақыты: 5 минут

Пісетін уақыты: 30 минут

Мөлшерлік калориясы: 184 ккал

Ингредиенттер

Пияз - 0,5

Аджика - 1 шай қасық

Болгар бұрышы - 1 дана

Баялды - 1 дана

Сіркесу - 1 шай қасық

Пісірілген тауық еті - 100 г

Ащы қызыл бұрыш - дәміне қарай

Жаңғақ - 50 г

Күнзе - 30 г

Сарымсақ - 1 түйір

Қара бұрыш - 0,5 шай қасық

Зәйтүн майы 2-3 ас қасық

Анар - 1 дана

Дайындалуы

1. Баялды және болгар бұрышын пісіреміз

Болгар бұрышы, баклажан
Табаға салынған болгар бұрышы және баялды. Көрнекі сурет: YouTube / Супер келін Диана

Баялды (баклажан) мен болгар бұрышын жақсылап жуып алыңыз. Содан соң табаға қақтама төсеңіз. Пешті 200 градусқа қойып, қыздырыңыз. Қызып тұрған пешке болгар бұрышы мен баялдыны салып, шамамен 30 минут пісіріп алу керек.

2. Пиязды тураймыз

Пиязды турау
Жіңішкелеп туралған пияз. Көрнекі сурет: YouTube / Супер келін Диана

Пияздың қабығын аршып, таза сумен жуып аламыз. Содан кейін ортасынан екіге бөлеміз. Пияздың жартысын жұқалап тураймыз. Туралған пиязды шұңғыл табаққа саламыз. Ыдыстағы пияздың үстіне аджика, сіркесу қосып араластырамыз.

3. Тауық етін тураймыз

Тауық еті
Туралған тауық еті. Көрнекі сурет: YouTube / Супер келін Диана

Алдын-ала пісіріп алған тауық етін жұқалап тураймыз. Туралған етті де пияз салынған ыдысқа саламыз. Оның үстіне ащы бұрыштың жартысын майдалап турап қосамыз.

4. Жаңғақ қосамыз

Грек жаңғағы
Майдаланған грек жаңғағы. Көрнекі сурет: YouTube / Супер келін Диана

Грек жаңғағын полиэтилен пакетіне салып, үстінен оқтаумен басып, майдалап аламыз. Жақсылап ұсақталған жаңғақты салат дайындап жатқан ыдысқа саламыз.

5. Күнзе қосамыз

Күнзе қосу
Күнзе қосылған салат. Көрнекі сурет: YouTube / Супер келін Диана

Күнзені (кинза) әбден тазалап жуып аламыз. Содан соң құрғатып алған дұрыс. Суынан құрғаған соң майдалап турап, салатқа қосамыз.

6. Болгар бұрышы мен баялдыны тураймыз

Баклажанды турау
Қабығы алынып туралған баялды. Көрнекі сурет: YouTube / Супер келін Диана

Алдын-ала пеште пісіріп алған болгар бұрышының сыртқы қабығын тазалап алып тастау керек. Содан соң ұзыншалап турап, салатқа қосыңыз. Баялдыны да ортасынан бір бөліп, сыртқы қабығынан тазалап алып, ішкі жағын болгар бұрышының пішіндей тураймыз да, салатқа қосамыз. Сарымсақты майдалап турап, салатқа қосамыз. Барлық өнімді жақсылап араластырып аламыз.

8. Зәйтүн майы мен қара бұрыш қосамыз

Зәйтүн майын қосу
Салатқа қосылған зәйтүн майы. Көрнекі сурет: YouTube / Супер келін Диана

Салатқа шамамен жарты шай қасық қара бұрыш қосамыз. Дәміне қарай зәйтүн майын құйып, араластырамыз. Дайын салаттың бетіне анар қосып әдемілеуге болады.

Мақаланың түпнұсқасы: https://kaz.nur.kz/lady/2045978-gruziyadagy-en-tanymal-salat-acecilidi-qalai-zasaidy/