Тез дайындалатын кеспе: Диана Есенбековадан дәмді тағам рецепті

Кеспе - қамырдан дайындалатын ас. Бұл тағам әлемнің көптеген асханасында пісіріледі. Ал қыстың суық күндерінде үйде ішкен кеспенің дәмі ерекше. Ендеше фуд-блогер Диана Есенбековамен бірге кешкі асқа кеспе пісіріп көріңіздер.

Күнделікті қолданыста кеспені "лапша" деп атайды. "Лапша" сөзі татар және ұйғыр тілдеріндегі lakča, чуваш тіліндегі läškä сөзінен шыққан. Қазақша мағынасы "сорпада қайнатылған қамырдың кішкентай бөліктері" дегенді білдіреді.

Әр түрлі пайдалы рецептермен таныс болғыңыз келсе, фуд-блогер Супер келін Диананың YouTube арнасына жазылып алыңыздар.

Сипаттамасы

Асханасы: Азиялық

Санаты: бас тағам

Дайындау уақыты: 10 минут

Пісетін уақыты: 1 сағат

Мөлшерлік калориясы: 127 ккал

Ингредиенттер

Ет - 300 г

Картоп - 3 дана

Пияз - 1 бас

Сәбіз - 1 дана

Болгар бұрышы - 1 дана

Өсімдік майы - 30 г

Томат пастасы - 2 ас қасық

Су - қазанның көлеміне қарай

Әмбебап дәмдеуіш - дәміне қарай

Ұн - 350 г

Жұмыртқа - 1 дана

Тұз - 1 шай қасық

Дайындалуы

1. Ет пен пиязды тураңыз

Сиыр еті жақсылап жуып, тураңыз. Еттің пішінін текшелеп тураған ыңғайлы. Содан соң пияздың қабығын аршып тазалаңыз. Пиязды да алдын-ала турап қойыңыз.

2. Көкөністерді тураңыз

Картоп пен сәбіздің қабығын аршып тазалаңыз. Тазаланған көкөністерді текшелеп тураңыз. Болгар бұрышын да жақсылап тазалап, ортасындағы дәндерін алып тастаңыз. Бұрышты да текшелеп турап шығыңыз.

3. Кеспе қамырын дайындаңыз

Шамамен 200 мл суға жұмыртқа мен тұз салып, бұлғауышпен араластырыңыз. Оның үстіне ұн салып, қамыр илеңіз. Қамырдың жұмсақ болмағаны дұрыс. Қамыр илеген соң оның бетін жакып, 30 минут қоя тұрыңыз.

4. Ет пен көкөністерді қуырыңыз

Қазанда қызып тұрған майға етті салып, қуырып алыңыз. Артынша пияз салып, оны да қуырыңыз. Туралған болгар бұрышын салыңыз. Содан соң үстіне сәбізді қосып қуырыңыз. Соңынан картопты салып, тағы қуырыңыз.

5. Томат пастасын салыңыз

Тағамға томат пастасын қосып араластырыңыз. Көкөністер мен еттің түсі әдемі болып қызара түскен кезде қазанға су құйыңыз. Сорпа қайнаған соң тұз бен дәмдеуіш қосыңыз.

6. Қамыр жайыңыз

Жарты сағат бойы иіні қанған қамырды жаюға кірісіңіз. Қамырдың үстіне ұн сеуіп, оқтаумен жайыңыз. Қамыр жайып жатқан кезде ұн себуді ұмытпаңыздар, себебі арасы жабысып қалмау керек. Сондай-ақ, қамыр біркелкі болып шығу үшін оқтауды күшпен баспаған жөн.

7. Қамырды кесіңіз

Қамыр жайып болған соң бетін ұн сеуіп, біркелкі етіп жағып шығыңыз. Ортасынан бір бөлінген қамырды бүктеңіз. Бүктелген қамырды кеспе пішінінде кесіп шығыңыз. Қайнап тұрған сорпаға қамыр кеспесін салыңыз. Қамыр бір-біріне жабысып қалмау үшін ожаумен бір былғап алыңыз.

8. Дайын тағамға ақжелкен қосыңыз

Тағамның дәмін келтіру үшін ақжелкен немесе күнзе (кинза) қоссаңыз болады. Кешкі асқа осы кеспені міндетті түрде пісіріп көріңіздер. Дәмі ерекше тіл үйіреді.