Жаңғақ пішінді печенье: Ақнұр Тілекқызынан рецепт

Бала күнімізде әйгілі жаңғақ пішінді печеньелер көптің сүйікті тәттісі болғаны анық. Бүгінгі материалда назарларыңызға атақты печеньенің тез әрі оңай жасалатын рецептін ұсынамыз.

Кеңес Одағы кезінде бүлдіршіндердің сүйікті тәттісі - жаңғақ тәрізді печеньелер "хит" пірәндікке айналған еді. Танымал фудблогер Ақнұр Тілекқызы назарларыңызға әйгілі печеньенің тез әрі оңай пісетін рецептін ұсынады. Фудблогердің YouTube арнасынан көптеген тәтті-дәмдінің рецептімен таныс бола аласыздар.

Сипаттамасы

Асхана: Еуропа

Санаты: десерт

Дайындалу уақыты: 10 минут

Дайын болу уақыты: 20 минут

Құрамы

Жұмыртқа - 1 дана

Сары май - 125 гр

Қант ұнтағы - 1 стақан

Ванилин - 0,5 шай қасық

Қопсытқыш - 1 шай қасық

Какао ұнтағы - 1 шай қасық

Ұн - 1,5/2 стақан

Дайындалуы

1. Қамыр илейміз

Сары майға бір жұмыртқа, қант ұнтағын қосып, жақсылап араластырамыз. Оның үстінен ванилин, қопсытқыш, бір шай қасық какао, ұн қосып, араластырып, жұмсақ қамыр илейміз.

2. Қамырдан жаңғақ тәрізді печенье жасаймыз

Қамырды кішкене бөліктерге бөліп, оған домалақ пішін береміз. Сосын әр домалақты екіге бөліп, пышақпен жаңғақ тәрізді өрнектер салып шығамыз.

3. Печеньені пісіреміз

Пешті алдын ала 180 градуста қыздырып аламыз. Сосын дайын печеньелерді 15 минутқа қойып, қызарғанша пісіріп аламыз.

4. Печеньенің ортасына қоюлатылған сүт жағамыз

Піскен печеньенің ортасына қалауыңызша қоюлатылған сүт немесе шоколад жақсаңыз болады. Осылайша, дәмі тіл үйіретін печеньелер дайын болады.