Хычины: Ірімшік қосылған жайма нан рецебі
Жарияланған күні:
![Дайын болған хычины. Скриншот Дайын болған хычины. Скриншот](https://cdn.nur.kz/images/1120x630/98642f443b3a7671.jpeg)
Хычины - тау халықтары арасында кеңінен танымал тағам. Ірімшік қосылып жасалатын ұлттық тағамды үй жағдайында қалай дайындауға болады? Бүгінгі материалдан білетін боласыздар.
Хычины - Солтүстік Кавказ аймағында танымал болған, тау халықтарының ұлттық тағамдарының бірі. Ірімшік қосылған жайма нанның шыққан жері - Кабардин-Балқар елі деген дерек бар. Танымал фудблогер Диана Есенбекова назарларыңызға дәмі тіл үйіретін жайма нанның рецебін ұсынатын болады.
Сипаттамасы
Асхана: Солтүстік Кавказ елдері
Санаты: басты тағам
Дайындалу уақыты: 15 минут
Дайын болу уақыты: 10 минут
Құрамы
Жылы су - 300 мл
Ерітілген сары май - 150 г
Ашытқы - 1 ас қасық
Қант - 1 ас қасық
Жұмыртқа - 1
Тұз - 1 шай қасық
Ұн - 500 г с
Cулугуни немесе моцарелла ірімшігі - мөлшеріне қарай
Дайындалуы
1. Қамырдың сұйық құрамын дайындаймыз
![Қамырдың сұйық құрамы. Скриншот Қамырдың сұйық құрамы. Скриншот](https://cdn.nur.kz/images/1120/4661c9a2431b3de5.jpeg)
Шұңғыл ыдысқа жылы су, ерітілген май, ашытқы мен қантты араластырып, 15 минутқа бетін жауыр қоямыз. Одан кейін бір жұмыртқаны қосып, дәміне қарай тұз сеуіп, араластырамыз.
2. Ұн қосып, қамыр илейміз
![Ұн қосып, қамыр илейміз. Скриншот Ұн қосып, қамыр илейміз. Скриншот](https://cdn.nur.kz/images/1120/55a0c07856ff481a.jpeg)
Дайын қоспаға ұнды електен өткізіп, біртіндеп қосамыз. Сосын жұмсақ қамыр илейміз. Қамырдың бетін жауып, жарты сағатқа қойып, ашытамыз.
3. Қамырды жаямыз
![Қамырды бірнеше бөлікке бөлеміз. Скриншот Қамырды бірнеше бөлікке бөлеміз. Скриншот](https://cdn.nur.kz/images/1120/b44c03a85217913f.jpeg)
Ашыған қамырды алып, алдымен екіге бөлеміз. Сосын әр бөлікті үшке бөлеміз. Әр бөлікті орташа қалыңдықта жаямыз.
4. Қамырға ірімшікті салып, тағы да жаямыз
![Қамырдың ішіне ірімшік саламыз. Скриншот Қамырдың ішіне ірімшік саламыз. Скриншот](https://cdn.nur.kz/images/1120/9f0b35c9b39150df.jpeg)
Ірімшікті ірі үккіштен өткіземіз. Сосын әр дөңгелек қамырдың ортасына салып, қамырдың жан-жағын түйеміз. Осылайша, сыр қосылған қамырды тағы да күлше тәрізді етіп, жаямыз.
5. Күлшелерді пісіреміз
![Күлшелерді пісіреміз. Скриншот Күлшелерді пісіреміз. Скриншот](https://cdn.nur.kz/images/1120/dd95d3841d34666d.jpeg)
Дайын болған күлшені қызып тұрған табаға салып, екі жақ беті қызарғанша пісіреміз. Күлшелер дәмді болуы үшін, оған сары май жағып, дастарханға ұсынсаңыз болады.
Мақаланың түпнұсқасы: https://kaz.nur.kz/lady/2089742-hychiny-irimshik-qosylgan-zhaima-nan-retsebi/