Ірімшік қосылған картоп құймақтары: Ариана ұсынған дәмді әрі ерекше рецепт

Құймақтарды әдетте жұмыртқа мен ұннан жасайды. Десе де, картоп қосылған құймақ жайлы естімеген боларсыздар. Бүгінгі материалда ірімшік қосылған картоп құймақтары туралы айтатын боламыз.

Ірімшік қосылған картоп құймақтарының рецебін танымал фудблогер Ариана Дәуренқызы ұсынады. Блогердің YouTube арнасынан өзге де дәмі тіл үйіретін тағамдардың рецебімен таныс бола аласыздар.

Сипаттамасы

Асхана: Славян елдері

Санаты: тіскебасар

Дайындалу уақыты: 15 минут

Дайын болу уақыты: 10 минут

Құрамы

Жұмыртқа - 3

Картоп - 4-5 дана

Тұз - дәміне қарай

Ыстық сүт - 400 мл

Аскөк - дәміне қарай

Ірімшік (сулугуни) - 70 гр

Өсімдік майы - 4 ас қасық

Ұн - 150 гр

Дайындалуы

1. Қайнатылған картопты еземіз

Қайнатылған 4-5 дана картопты шұңғыл ыдысқа салып, жақсылап езіп аламыз.

2. Жұмыртқа қосамыз

Картоп езбесінің үстіне үш дана жұмыртқаны қосамыз. Дәміне қарай тұз себеміз. Сосын бәрін жақсылап араластырамыз.

3. Ыстық сүт қосамыз

Дайын болған картоп езбесіне ыстық сүттің жартысын қосамыз. Тағы да жақсылап араластырамыз.

4. Ұн қосамыз

Қоспаға ұнды біртіндеп қосып, біркелкі етіп араластырамыз. Бұл ретте қамырдың іртік болып шықпауы үшін, ұнды шанышқымен жақсылап араластырған жөн.

5. Ірімшік пен аскөкті қосамыз

Құймақтың қамырына алдымен аскөкті, кейін ірімшікті қосамыз. Сосын бәрін жақсылап араластырамыз. Негізгі массаға сүттің қалған бөлігін қосып, араластырамыз. Соңында сұйық май қосып, тағы да жақсылап араластырып аламыз.

6. Құймақты ыстық табада пісіреміз

Табаны пеште қыздырып, құймақты ожаумен құямыз. Осылайша, құймақтың қамыры біткенше, толықтай пісіріп шығамыз. Құймақтар жұқа әрі дәмді болып шығады.