Берік Уәли қанша қазақстандық БЖЗҚ-дан алған қаржымен ипотекасын жапқанын айтты

Мемлекет басшысы Қасым-Жомарт Тоқаевтың баспасөз хатшысы Берік Уәли зейнетақы жинағын мерзімінен бұрын алған 16 мыңнан астам қазақстандықтың ипотекалық қарызын толық төлегенін мәлім етті.

"Мемлекет басшысы Қасым-Жомарт Тоқаевтың тұрғын үй жағдайын жақсартуға арналған зейнетақы жинақтарын пайдалану жөніндегі бастамаларын орындау аясында 16 075 қарыз алушы бұған дейін банктерден тұрғын үйлері үшін алған жалпы сомасы 62 миллиард 41 миллион теңге ипотекалық қарызын толық өтеді", - деп жазды Берік Уәли Facebook парақшасында.

Сонымен бірге, тағы 47 133 қарыз алушы жалпы сомасы 144 млрд 53 млн теңге болатын тұрғын үй ипотекалық қарыздарының бір бөлігін өтеу үшін біржолғы зейнетақы төлем жүйесін пайдаланған.

Одан бөлек, 8 889 қарыз алушы банктерден жалпы сомасы 150 млрд 361 млн теңге болатын тұрғын үй ипотекалық қарызын алу үшін алғашқы жарна ретінде біржолғы зейнетақы төлемі қаражатын пайдаланған.

"Банктер бойынша ең көп қарыз алушы "Отбасы Банк" акционерлік қоғамында тіркелген. Олардың жалпы саны – 37 228. Біржолғы зейнетақы төлемін пайдалану арқылы тұрғын үй құрылыс жинақтары жүйесі бойынша берілген жаңа тұрғын үй ипотекалық қарыздарының мөлшері – 125 миллиард 29 миллион теңге.

"Сбербанк" АҚ ЕБ – қарыз алушылар саны бойынша екінші орында. Олардың жалпы саны – 11 483. Одан кейін "Қазақстанның Ұлттық Банкі" акционерлік қоғамынан – 9 488 және "Банк Центр Кредит" акционерлік қоғамынан – 8 432 адам қарыз алған. Аталған банктерден біржолғы зейнетақы төлемін пайдалану арқылы жаңадан алынған тұрғын үй ипотекалық қарыздарының мөлшері – 23 миллиард 167 миллион теңге", - дейді президенттің баспасөз хатшысы.