Доллар күн сайын арзандап жатыр: Экономист бағамға қатысты болжам жасады

5 сәуірдегі кешкі сауданың нәтижесінде доллар бірден 9 теңгеге арзандады. Дегенмен қазақстандық экономист АҚШ валютасы бұрынғы бағаға қайта келеді деп есептейді.

Ақша айырбастау орындарында доллар 466 - 472 теңгеден сатылып жатыр. Айта кетейік, бұл АҚШ валютасы арзандап жатқан алғашқы күн емес. Осы орайда сарапшылар қорытынды жасауға асықпауға кеңес беріп отыр, деп хабарлайды Астана телеарнасы.

"Биыл АҚШ-тың Федералдық резервтік жүйесі өз мөлшерлемесін тағы бірнеше есе көтереді, бұл доллар тек теңгеге ғана емес, әлемнің барлық басқа валюталарына қатысты қымбаттайды деген сөз", - деп түсіндірді қаржы сарапшысы Расул Рысмамбетов.

Жыл басынан бері АҚШ базалық мөлшерлемені бір рет қана көтерген. Олар бағамды қайта көтермейінше, теңге нығая бермек. Маман мұнайдың бірте-бірте төмендеуі де бұған кедергі болмайтынына сенімді.

Расул Рысмамбетовтың айтуынша, баррелінің құны 120 доллар болмаса да, қазіргі баға Қазақстан үшін тиімді.

"Мұнай өндіруші ел ретінде біз үшін мұнай бағасының барреліне 70 доллардан жоғары болуы – нағыз сыйлық. Сондықтан оның 71 болуы, 100 болуы, қалай болғанда да, керемет. 60-тан жоғары бағаға шыдауға болады, 70-тен жоғары жақсы", - дейді сарапшы.