Маусым айынан бастап Қазақстанда зейнетақы мен жәрдемақы көлемі өседі

Биыл 1 сәуірде уәде етілгендей, маусым айынан бастап қазақстандықтардың зейнетақы мен жәрдемақы көлемі өседі. KAZ.NUR.KZ тілшілері төлем мөлшері қалай өзгеретінін және өткен айлар үшін қосымша төлемдер бола ма деген сұрақтардың жауабын іздеп көрді.

Зейнетақы мен жәрдемақының ұлғаюына биыл сәуірде айлық есептік көрсеткіштің (АЕК) және ең төменгі күнкөріс деңгейінің (ӨМ) жоспардан тыс өсуі әсер етті. Сәуір айынан бастап қазақстандықтар көлемі ұлғайтылған төлемдерді алуы тиіс еді. Алайда "Азаматтарға арналған үкімет" мемлекеттік корпорациясы төлемдер сомасын көтеру туралы бұйрыққа бір айдан кейін, яғни, 2022 жылғы 12 мамырда ғана қойған.

Сол уақытта "2022-2024 жылдарға арналған республикалық бюджет туралы заңға өзгерістер мен толықтырулар енгізу туралы" Заң шықты. Оған сәйкес, 1 сәуірден бастап қазақстандықтардың зейнетақысы мен жәрдемақысы көтерілуі керек болған.

Төлем мөлшері қалай өзгереді

Инфляцияны ескере отырып, зейнетақы мен Мемлекеттік әлеуметтік сақтандыру қорынан төленетін кейбір әлеуметтік төлемдердің мөлшері қосымша 4 пайызға индекстелді.

Бұл өсім базалық зейнетақы мен мемлекеттік жәрдемақыға да әсер етті. Сәуірде АЕК пен күнкөріс деңгейінің өсуіне байланысты олар да сәйкесінше 4 пайызға өсті.

Заңға сәйкес 1 сәуірден бастап мынадай көрсеткіштер төмендегідей сомада белгіленді:

• жәрдемақыларды және басқа да әлеуметтік төлемдерді есептеуге арналған айлық есептік көрсеткіш – 3 180 теңге мөлшерінде;
• ең төменгі зейнетақы – 48 032 теңге;
• ең төменгі күнкөріс деңгейі – 37 389 теңге;
• базалық зейнетақы төлемінің ең төменгі мөлшері – 20 191 теңге.

Осылайша, қазақстандықтар үшін 2022 жылдың маусымынан бастап зейнетақы мен жәрдемақы көлемі артты. Жалпы алғанда төлем көлемі шамамен 6,6 миллионға артады.

Еске сала кетсек, зейнетақы, жәрдемақы және әлеуметтік төлемдердің кешіктірілуіне байланысты қазақстандықтар сәуір және мамыр айларына қосымша төлемдер алады.