Қазақстан банктерін QR-кодтардың бірыңғай жүйесіне көшіру көзделуде

Сауда және интеграция вице-министрі Әсел Жанасова қазақстандық банктерді QR-кодтардың бірыңғай жүйесіне көшіру жоспары барын айтты, деп хабарлайды KAZ.NUR.KZ.

Әсел Жанасова электронды коммерция форумында QR кодтардың да төлем құралы екенін айтты.

"Өткен жылы біз QR төлемін теңестіру, QR кодтарын стандарттау бойынша жұмыс жасадық. Қай банктің клиенті екеніңіз маңызды емес. QR болса, кез келген банк бірін-бірі "оқи алуы" керек. 10 POS-терминал қажет емес. Бизнес үшін әр терминалға ақы төлеудің қажеті жоқ: нарықтың барлық қатысушыларымен жұмыс істей алатын бір терминал болғаны дұрыс", - деді ол.

Вице-министр биылғы жылы барлық банктер өз жүйесін пысықтайтынын және әрбір азаматтың кез келген терминалда QR арқылы төлеуге мүмкіндігі болатынын атап өтті.

"Олар (банктер – ред. ескерт.) бірін-бірі "оқи" алатын болады", - деп түйіндеді сөзін Әсел Жанасова.